DILI-Daudaun ne’e administradór postu administrativu Kristu Rei, munisípiu Dili, rejista ona ema na’in-80 mak sei servisu ba Programa Mão de Obra Postu Administrativu (PMOPA) hodi limpeza jerál iha suku ida-idak.
“Ami rejistu feto hamutuk 35 no mane na’in-45 ne’e tau hamutuk 80 mak sei servisu iha programa PMOPA iha faze dahuluk hodi limpeza jerál, hamoos baleta kuak, hamoos duut, depois tau iha lixu ne’ebé estadu prepara atu nune’e ekipa servisu saneamentu kontrolu ra’ut tau iha karreta lori ba tau iha Tibar”, administradór postu Kristu Rei, Venâncio Tavares, hateten ba Timor Post iha nia servisu fatin Bekora, Kuarta (22/03).
Administradór ne’e haktuir, sidadaun na’in-80 ne’e mai husi suku 8 no aldeia 51 ne’ebé pertense iha postu refere mak sei servisu limpeza, maibé servisu refere halo rotasaun kada fulan atu nune’e komunidade ne’ebé laiha servisu sira bele hetan oportunidade liuhusi limpeza hodi hetan osan.
Enkuantu, programa ne’e fahe primeiru faze durasaun fulan neen no faze segundu nia durasaun fulan 6, konta hamutuk programa ne’e implementa tinan ida iha postu no suku ida-idak nian, maibé halo servisu rotasaun atu nune’e komunidade ne’ebé laiha servisu bele hetan hotu oportunidade.
Nia esplika, komunidade ne’ebé servisu limpeza ne’e kada loron hetan osan 5 USD. Enkuantu programa PMOPA ne’e di’ak, tanba fó benefísiu ba komunidade ne’ebé laiha servisu no sira bele aproveita servisu provizóriu liuhusi limpeza ida ne’e hodi hetan osan atu bele sustenta ba nesesidade família nian.
Iha parte seluk, administradór ne’e esplika, sira simu ona informasaun husi Prezidente Autoridade Munisípiu Dili (PAMD), maibé data fiksu mak seidauk los hodi implementa programa refere.
“Ami hein hela informasaun husi PAMD hato’o despaxu mai ami bele implementa ona programa ida ne’e iha kada suku no aldeia ida-idak, atu nune’e komunidade sira bele halo servisu liuhusi limpeza”, administradór ne’e haktuir.
Enkuantu, orsamentu propoin ba programa PMOPA ne’e ho montante 10.000 USD nia durasaun tinan ida, maibé suku ida-idak halo servisu ho rotasaun atu nune’e komunidade laiha servisu bele aproveita servisu.
Portantu, postu administrativu Kristu Rei ho nia suku hamutuk 8, mak suku Bekora, Kamea, Kulu-hun, Balibar, Hera, Metiaut, Ailok, Bidau Santana, ho nia xefe aldeia hamutuk 51 ho nia populasaun hamutuk 77.229 kompostu feto 38.182 no mane hamutuk 39.060.
1,019 total views, 3 views today
Bele hare Video Seluk :
Subscribe to Timorpost
