DILI (timorpost.com) – Federasaun Futebol Timor-Leste (FFTL), Segunda (07/11), halo ona pagamentu ba saláriu jogadór no treinadór sira, ne’ebé durante ne’e ezije FFTL, no hamosu preokupasaun boot iha públiku.
“Federasaun Futeból Timor-Leste (FFTL), halo ona pagamentu ba saláriu jogadores no treinadores, hahú husi Senior Feto no Mane, Sub-19 ba kompetisaun AFF, Sub-20 ba kompetissaun AFC no Sub-16 ba kompetissaun AFF,” dehan Sekretáriu Jerál FFTL, Grigorio Correia, ba Timor Post iha Bairru Grilhos, Segunda (07/11).
Nia reforsa, pagamentu ne’e hahú hala’o loron ohin no sei kompleta iha loron Kuarta-Feira, 09 Novembru tinan 2022.
Grigorio aumenta, relasiona ho polémika ne’ebé durante ne’e la’o iha públiku liuliu hadomi na’in Futeból iha Timor-Leste, mak FFTL liuhusi esforsu másimu konsege rezolve daudaun ona preokupasaun jogadores no treinadores husi kategoria ne’ebé temi ona iha leten.
Tanba ne’e, Ohin FFTL liuhusi Diresaun Finansas hahú halo pagamentu ba Selesaun Senior ba kompetisaun AFF Suzuki Cup 2020, Sea Games 2021 no mós jogu amigavel kontra Nepál, Camboja no Filipina.
“Ba pagamentu sira seluk, sei kompleta iha loron rua tuir mai. Pagamentu ne’e inklui mós salariu ba Ex-Treinador prinsipál Fabio Maciel no Treinador Fiziku Silas Paixão,” deklara nia.
Nia subliña, atu informa ba públiku hadomi na’in Futeból katak fontes husi fundus ne’e rasik mai husi doadores prinsipál FFTL nian FIFA no AFC. liuhusi prosesu lubun ida, fundus ne’e hetan aprovasaun husi FIFA no AFC iha fim de Outubru 2022.
1,635 total views, 3 views today
Bele hare Video Seluk :
Subscribe to Timorpost
