Dili (timorpost.com)— Observadór bola iha Timor-Leste, Alexandre dos Santos Vong, dehan daudaun ne’e sira nia parte seidauk bele halo predisaun ba ekipa ida ne’ebé mak atu sai kampiaun ba Liga Futeból Timor-Leste tinan ida ne’e.
Deklarasaun ne’e, nia hato’o ba Timor-Post hafoin konfirma kona-ba durante nia observasaun jogu liga Timorense ne’ebé mak paradu hafoin kontinua fali iha fulan kotuk no haree ba performed jogadór no klube sira ninian.
“Ha’u hanoin ita nia liga paradu kleur, maibé ita konsege la’o ka hadeer hikas iha fulan kotuk liubá no daudaun ne’e jogu kontinua la’o, maibé ita haree hosi performed klube no jogadór sira ninian tun tebes kompara ho uluk atividade sei la’o normál”, dehan Alexandre dos Santos Vong, ba jornalista Timor Post, iha Santa-Krús, Kuarta (15/03).
Nia hatete, tanba ne’e haree ba jogadór sira nia performed la hanesan ho tinan kotuk liubá inklui klube sira jigante ne’e mós agora performed monu hotu, ne’e bazeia ba nia observasaun jogu durante semana tolu ona la’o iha estádiu munisipál Dili.
Nia subliña, entaun kona-ba atu halo predisaun ba jogu no klube sira atu sai kampiaun tinan ida ne’e sei difisil, tanba klube sira maioria lakon hotu no laiha ida mak seidauk lakon, sira manan lakon no empate iha hotu, entaun difisil.
“Ha’u hanoin ita seidauk bele halo predisaun, tanba klube sira ne’e hotu-hotu hetan ona derrota, maski balun joga ona da-tolu ka da-haat balun seidauk, maibé sei difisil atu dehan ida ne’ebé mak atu sai kampiaun iha tinan ida ne’e”, nia hateten.
Tanba ne’e nia parte deklara, ekipa sia ne’ebé mak kompete iha liga Timorense primeiru divizaun époka ida ne’e hotu-hotu sei iha oportunidade hodi bele sai kampiaun, maibé ba semana ida ka rua mai tan mak foin bele hatene ida ne’ebé mak labele ona atu sai kampiaun no ida ne’ebé mak sei bele.
“La’ós ida ne’e de’it, ba tinan ida ne’e, ekipa ne’ebé mak atu degrada ba segundu divizaun ne’e mós seidauk hatene, tanba sira hotu-hotu hanesan, entaun ekipa hotu-hotu sei esforsu hodi hadook-an hosi degradasaun iha tinan ida ne’e”, nia esplika
1,239 total views, 3 views today
Bele hare Video Seluk :
Subscribe to Timorpost
