Dili (timorpost.com)—Jogu kontinuasaun segundu divizaun Liga Futeból Timor-Leste (LFTL), Lica-Lica Lemorai hadau Pontus tolu hodi dudu nia adversáriu Santa-Krús ba Zona Mean.
Iha jogu primeiru parte nia ekipa rua mai kedas ho estratéjia no tátiku ne’ebé mak sira preparadu ona durante sira treinu, inklui sira nia jogadór line-up sira ne’ebé mak treinadór fihir ona.
Tanba hakarak ka lakohi ekipa rua tenke hadau malu manán iha jogu segunda ne’e atu nune’e bele hetan Pontus tolu hodi hakat sai hosi liña mean ka zona degradasaun LFTL ba terseiru divizaun iha tinan oin.
Nune’e ekipa rua mai ho prinsípiu hanesan hakarak manán hotu ho esforsu ne’ebé mak hanesan hodi hein desizaun ikus ka jogu termina durante minutu 90 nia laran, mak bele hatene ida ne’ebé mak manán ka lakon oin ekipa rua fahe Pontus hanesan.
Iha ne’ebá ekipa rua mai ho ambisaun ne’ebé makaas hakarak hadau malu oportunidade di’ak, maibé sorte aat ba ekipa Lica-Lica Lemorai Fc iha minutu 14, tanba nia defeza, Elias Gomes, halo auto golu ba nia rede, nune’e halo nia ekipa sofre uluk ho score 1-0 hosi Santa-Krús Fc.
Ho score ne’e jogu sai manas liu tan ba ekipa rua ne’e, hodi lansa kontra atake ba malu, maibé la iha golu ruma mak akontese to’o termina jogu primeira parte.
Kontinua ba jogu segunda parte ekipa Lica-Lica Lemorai Fc ne’ebé mak sofre uluk golu ida iha primeira parte halo kedas mudansa ba tátika ho nune’e tama ba iha minutu 60, jogadór Andre Sarmento, susesu fura rede Santa-Krús Fc hodi halo score mudansa ba 1-1
Ho score refere intensidade jogu komesa manas liután no tama ba iha minutu 70 Lica-Lica Lemorai Fc lidera hikas ho score 2-1 hafoin jogadór Inácio Magno tama tan golu ida iha ne’ebé lori nia ekipa lidera provizóriu iha segundu parte.
Enkuantu ekipa Santa-Krús ne’ebé mak lidera provizóriu iha jogu Primeiru parte ne’e la konsege responde golu, nune’e jogu termina esforsu sira ne’ebé mak halo la fó rezultadu di’ak to’o vitória ba Lika-Lika Lemorai Fc manán ho score 2-1.
Hosi rezultadu vitória ne’e lori ekipa Lica-Lica Lemorai Fc haksoit sai husi Zona Mean ka Zona Degradasaun LFTL époka 2022-2023 segundu divizaun, enkuantu dudu tun ekipa Santa Krús ba zona degradasaun ho Pontus 0 hosi jogu rua derrota hotu.
692 total views, 3 views today
