DILI (timorpost.com) — Partidu Kmanek Haburas Unidade Nasionál Timoroan (KHUNTO), fiar Partidu Kongresu Nasionál Rekonstrusaun Timorense (CNRT) ho Partidu Demokrátiku (PD), sei ukun ho espíritu polítiku ne’ebé forsa tebetebes.
“Ita fó fiar ba partidu rua CNRT ho PD, tanba governu da-sia sira mak forma, entaun sira iha responsabilidade moral ida ne’ebé dignu, atu fó dezenvolvimentu ho serteza ba povu”, Vise Xefe Bankada KHUNTO, Deputadu Antonio Verdial de Souza, hato’o asuntu ne’e liuhusi plenária Parlamentu Nasionál, Tersa (04/07).
Nia dehan, problema hothotu ne’ebé mak povu hasoru, oinsá mak atu fó solusaun ida dignu ba sira, maibé partidu rua entre CNRT ho PD mak halo aliansa hodi ukun iha Nonu Governu, nune’e KHUNTO fiar katak, sira sei responde ba preokupasaun sosiál sira.
“Ita sempre fó fiar ba ita-nia governu atuál, ne’ebé hahú funsiona sira-nia servisu, tanba ne’e ita fiar ba sira, sei kumpre promesa polítiku sira ne’ebé harii iha sosiedade”, nia afirma.
Nia hatete, entre partidu rua-nia objetu atu luta ba progresu, no iha figura importante sira hanesan Kay-Rala Xanana Gusmão, Mariano Assanami Sabino ho Francisco Kalbuadi Lay, ne’ebé iha espíritu forte atu ukun duni nasaun no povu.
Lideransa husi partidu rua ne’e mai ho forsa kapasidade polítiku rasik, tanba ne’e fiar katak Nonu Governu Konstitusionál, sei ukun ho responsabilidade, la’ós ho oportunidade husi povu no nasaun nian.
“Tanba ita iha esperansa boot ba sira atu ukun, maski partidu KHUNTO mai ho kadeira lima de’it, maibé prontu sai opozisaun ida ne’ebé atu serví duni nia povu, no oinsá hamutuk ho bankada governu, atu estabiliza pas ba setór dezenvolvimentu iha Timor Leste”, nia kompromete.
Nia haktuir, maski partidu KHUNTO iha opozisaun, maibé sei hamutuk ho lejizlatura daneen, hodi rezolve problema sosiál ne’ebé durante ne’e karik governu seidauk dezenvolve ho másimu.
“Destinu povu no nasaun atu la’o ba oin, presiza servisu hamutuk, maski ita mai ho partidu ketaketak, maibé servisu nu’udar reprezentante povu, ita presiza hamutuk, hodi kria estabilidade nasionál ba povu tomak, ida ne’e mak nasaun no povu nia interese”, nia subliña.
Iha fatin hanesan, Deputadu Bankada Demokrátiku, Antonio da Conceição ‘Kalohan’, hatete governu foun ukun ho responsabilidade, la’ós ho oportunidade, nune’e atu fila lia katak, presiza mós oportunidade antes ba responsabilidade, tanba ne’e mak membru governu ida agora, mai ho figura intelektuál, atu lidera governu ho di’ak.
Nune’e mós ho lideransa sira hanesa Kay Rala Xanana Gusmão, Mariano Assanami Sabino ho Francisco Kalbuadi Lay, iha otimista katak governu agora ne’e forte tebetebes, tanba ne’e dehan sidi ka monu ne’e imposivel.
“Ita fiar katak husi figura tolu ne’e mak hamutuk ona, sei fó garantiadu ba susesu tuir interese povu no nasaun nian, hodi dezenvolve liután promesa polítiku hothotu ba povu”, nia afirma.
Kalohan haktuir, Nonu Governu mai ho espíritu polítiku ba dezenvolvimentu ida ne’ebé forte tebes, tanba ne’e mak nunka hakfodak dehan governu ne’e sei falla iha dalan klaran, ne’e susar tebes.
“Povu fó fiar ba partidu CNRT ho PD kadeira 37, ne’e governu ida ne’ebé forsa tebetebes, nune’e laiha partidu ida mak atu hamonu, maibé sei forsa ba oin”, Sekretáriu Jerál PD ne’e subliña.
2,646 total views, 3 views today
Bele hare Video Seluk :
Subscribe to Timorpost
