DILI, (timorpost.com)— Diretór Ezekutivu Fundasaun Mahein (FM), Nelson Belo, observa katak servisu Polísia Nasionál Timor-Leste (PNTL) maduro ona maibé dezenvolvimentu iha PNTL durante tinan 24 nia-laran ki’ak no mukit loos, tanba ne’e, presiza iha investimentu di’ak ba instituisaun refere.
Nia dehan, instituusaun PNTL bele dehan idade ne’ebé mak uluk idade ki’ik, agora idade 24 anos,ne’e bele dehan joven, maske maduro ona maibé sei mukit.
“Problema ne’ebé akontese, tantu eventu nasionál ho internasionál tenke utiliza PNTL maibé atu dehan katak politkamente dezenvolvimentu ba instituisaun PNTL ne’e mukit no ki’ak loos, entaun presiza iha investimentu di’ak ba instituusaun ida-ne’e, liuliu ba rekursu umanu sira, sira presiza aumenta treinu liután, la’os treinu ida jeneru fó ne’e, ita iha ona treinamentu ida ne’ebé kursu ba ofisiál sira, ne’ebé Instutisaun Defeza Nasional fó, maibé ita presiza oinsá atu através husi operasaun seguransa ho rai-seluk para bele haruka sira liu para sira mos bele ganha espriénsia internasionál”, Nelson Belo, informa ba Timor Post iha kna’ar fatin, Sesta (22/03).
Nia kompara entre PNTL ho Falintil Forsa Defeza Timor-Leste (F-FDTL), PNTL menus kompara ho F-FDTL tanba F-FDTL avansadu liu tanba sira iha treinamentu barak. Nune’e mós asuntu sira seluk kona-ba lijislasaun sira ne’ebé iha.
“Ita-nia boot sira ne’ebé jere polítika sira ba la kria no la halo buat foun, mais lei ida ne’ebé iha ne’e, sira kahur ba mai, ezemplu lei estatutu PNTL lei orgániku, lei ida-ne’e kedok tuun sa’e de’it, la kria buat foun, ne’ebé politizasaun ba instituisaun PNTL ne’e mós boot tebes. Tanba ida-ne’e sai problema ba dezenvolventu instituisaun PNTL nian. La’os pesoál servisu PNTL nia sala, maibé politiku ida ne’ebé jere PNTL ne’e mak laiha vizaun ida ne’ebé klaru atu lori instituisaun ba ne’ebé, Segundu, governu troka dala hira ona, no ema sira ne’ebé sai Ministru Interiór sira ne’e, ba ne’eba la haree ba asuntu PNTL nível mais boot, ita presiza iha lei programa polísia ne’e tenke iha”, akresenta Nelson.
Timor-Leste presiza iha planu ne’ebé estratéjiku liu, labele polítiku ida ba hakarak rekruta membru de’it maibé tenke iha ona polítika ne’ebé mai ho nia programa estratéjiku hodi dezenvolve PNTL.
Presiza hanoin ona kona-ba kaderneta ka konstituisaun PNTL nian hodi haree ba nia kooperasaun ho nasaun viziñu no nasaun históriku no estratéjiku sira, abranje liután interese estratéjiku Estadu nian(*)
2,310 total views, 3 views today
Bele hare Video Seluk :