DILI, (tomorpost.com)— Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’ rekuñese, komandu seidauk iha lei hodi reforma membru F-FDTL ne’ebé idade avansadu ona.
“Agora falta de lei, foin mak halo lei reforma, lei kareira militár sira foin mak hadi’a, regulamentu oioin foin hadi’a, depois mak ita bele hahú reforma ida-ne’e”, dehan Tenente Jenerál Falur Rate Laek, ba jornalista iha Kuartel Jenerál F-FDTL, Fatuhada, Segunda, (29/01).
Tenente Jenerál ne’e hatutan, militár sira ne’ebé idade avansadu iha hela konstrazementu, liuliu veteranu sira ativu iha forsa armda nian, tanba foin mak harii instituisaun forsa armda.
“Ita iha konstrazementu ida mak ita-nia militár sira ne’ebé idade, idade ami sira ne’e konstrazementu ida-ne’e, mais tanba ita foin mak hahú, depois ita halo prosesu luta ida diferente iha mundu, kuandu prosesu pos-konflitu ne’e sempre iha problema oioin. Ita-boot sira haree tinan hirak liubá krize konflitu militár mosu, no agora forsa armada sei iha situasaun hadi’a ida-ne’e maibé tinan-tinan labele hanesan ne’e hela de’it”, nia hatete.
Tanba ne’e presiza kria kondisaun, tanba atu moderniza forsa armada ne’e presiza kria ona regulamentu no lei sira para implementa tuir lei sira ne’e hodi reforma miltár sira ne’ebé idade avansadu ona.(*)
768 total views, 6 views today
Bele hare Video Seluk :
Subscribe to Timorpost
