DILI, (timorpost.com) – Joven husi bairru-bairru ne’ebé harii prezepiu iha Palásiu Prezidensiál ohin madrugara, (09/01) konfrontu tuda malu iha fatin prezépiu nian Palásiu Prezidensiál oin tanba la satisfas ho rezultadu kompetisaun prezépiu husi Prezidénsia Repúblika (PR).
“Sira tuda malu tanba sira balu la sastifas ho kompetisaun kona-ba prezepiu nian, entaun sira hamosu tuda malu”, Komandante Polísia Nasionál Timor-Leste (PNTL) munisípiu Dili, Superintendente Xefe Polísia, Orlando Gomes, informa ba jornalista iha kuartel munisípiu Dili, Kaikoli, Segunda, (08/01).
Konfrontu ne’e akontese ohin madrugada hale’u tuku 4:00 no PNTL konsege ka’er ona joven 20 rein ne’ebé komete tuda malu refere.
“Ohin Madrugada dia 8 Janéiru 2024, dader madrugada tuku 4:00, mosu konflitu ida iha Aitarak Laran, aldeia Anin-Fuik, suku Kampung Alor, gupu joven sira tuda malu, ita-nia polísia tuun halo atuasaun, halo kapturasaun ba sira kuaze 20 resin, ita halo identifikasaun depois ita identifika na’in 15 mak involve iha konflitu Aitarak Laran. Ita-nia membru polísia sira tuun halo atuasaun, joven sira ne’e halo agresaun hasoru membru polísia, tanba ida-ne’e mak ita halo kapturasaun ba joven sira ne’e hodi halo identifikasaun”, Komandante Orlando, esplika.
Nia hatutan, krime ne’ebé joven sira halo ne’e mak obstrusaun autoridade públiku, tanba sira tuda hasoru seguransa bainhira halo atuasaun. Joven na’in 15 ne’ebé identifikadu envolve iha konflitu tuda malu refere sei kumpri hela sela detensaun durante oras 72 ka loron 3, depois sei entrega ba Ministériu Públiku hodi submete ba priméiru interogatóriu.
“Joven sira sei hatama ba sela oras 72, ita sei aprezenta ba Ministériu Públiku hodi halo priméiru interogatóriu”,nia hatete.
Enkuantu, iha konflitu ne’e maske intervensaun polísia nian hetan atake maibé laiha membru polísia ida mak kanek. Iha konflitu ne’e joven sira konsege tuda kona odamatan salon nian iha fatin refere mak hetan estragu ka rahun.
Manán na’in ba kompetisaun prezépiu iha bairru-bairru, Prezidente Repúblika (PR), José Ramos Horta, no Priméiru Ministru (PM), Kay Rala Xanana Gusmão, ho entidade seluk entrega ona prémiu no sertifikadu ba manán na’in sira iha loron 31 fulan-Dezembru tinan 2023 antes tinan foun 2024 troka tinan tuan.(*)
891 total views, 3 views today
Bele hare Video Seluk :