DILI (timorpost.com)—Diretór Gabinete relasaun Externa no Komunikasaun iha APC, Anacleto Caetano, hatete, Korpu Bombeiru prontu tesi ai-hun sira ne’ebé fó ameasa no risku ba ema nia vida, iha Munisípiu Dili inklui Munisípiu sira.
“Korpu sempre prontu, maibé tenke hetan autorizasaun hosi parte Ambientál nian inklui komunidade rasik maka tenke mai hato’o pedidu”. Diretór Gabinete relasaun Externa no Komunikasaun iha APC, Anacleto Caetano ba Timor Post iha nia kna’ar fatin, Kaikoli, Kuarta, (15/11).
Diretór APC haktuir, iha terenu it haree ekipa EDTL mak sempre tesi ai sira ne’ebé sai risku ba eletrisidade. Korpu Bombeiru prontu ezekuta mandadu bainhira iha pedidu husi komunidade sira.
“Komunidade rasik mak tenke hato’o proposta mai, ne’e ami haruka ona Bombeiru ba tesi ai-hun sira tuan ne’e”, Diretór Anacleto informa.
Liga ba akontesimentu horisehik loraik Tersa,(14/11), anin boot hodi rezulta ai-hali hun boot ida tohar rezulta karreta rua hetan at, fó hanoin ona mai ita tomak atu kuidadu an iha tempu udan no anin tanba proibidu mai moris.
“Tanba ne’e nafatin antesipa iha tempu udan no anin”. Nia informa.
Haree ba situasaun horisehik, Diretór APC, husu ba Instituisaun relevante sira ne’ebé toma responsabilidade ba Ambiente, tenke identifika ai-horis protejidu sira ne’ebé tuan ona fó ameasa ba ema nia vida para hato’o mai Autoridade haruka fali Bombeiru tun ba tesi sai tiha para labele fó ameasa ba ema nia vida.
Durante ne’e APC identifika Ai-hun tuan sira iha Dili laran ne’ebé fó ameasa ba ema nia vida hanesan halihun iha Palacio Governu, Parlamentu, Kafé Brazil nia oin, ai-hun boot sira iha Pertamina Internasionál Pantai-kelapa, Hali-hun iha UNDIL nia oin, iha Bekora, Taibesi, maibé hirak ne’e atu tesi tenke hetan autorizasaun Ambiente nian.
1,272 total views, 3 views today
Bele hare Video Seluk :