DILI (timorpost.com) — Ekipa Konjuntu Polisia Nasionál Timor-Leste (PNTL), iha loron Segunda (16/01), kaptura joven na’in-rua ho inisiál MP ho A iha Suku Lemia, Postu Administrativu Atsabe, Munisípiu Ermera, la’ós autór ba kazu sona mate Isac Sinarai da Costa, iha area Delta III.
Portavós Komandu Jerál PNTL, Superintendente Xefe Arnaldo de Araújo, hatete ekipa konjuntu kompostu husi Servisu Informasaun Polisia Nasionál (SIPN)/ Aranha Makikit, Forsa Polisia (FP), Investigasaun Kriminál (DIK), Unidade Informasaun FALINTIL (UIF), kaptura joven na’in-rua inisiál MP ho A iha Suku Lemia, Postu Administrativu Atsabe, Munisípiu Ermera ne’e, la’ós autór ba kazu omisídiu iha Delta Elemloi, tanba ne’e bolu mai halo identifikasaun de’it durante oras 12.
“Ita-nia ekipa konjuntu PNTL iha loron horisehik asegura tan joven na’in-rua iha Suku Lemia, Postu Administrativu Atsabe, Munisípiu Ermera, la’ós autór ba kazu omisídiu iha area Delta Elemloi, maibé lori mai iha Departamentu Investigasaun Kriminál (DIK) Komandu Jerál PNTL hodi submete ba prosesu identifikasaun durante oras 12 nia laran, hafoin ita liberta fila fali,” nia hateten iha Komandu Jerál PNTL, Kaikoli, Tersa (17/01).
Nia hatutan, ekipa konjuntu ne’ebé halo kaptura ba joven na’in-rua ne’e, atu halo identifikasaun de’it, tanba PNTL deskonfia envolve mós iha kazu omisídiu Vítima Isac Sinarai da Costa, ho idade 20, tanba iha artigu 52 kódigu prosesu penal fó dala ba PNTL atu identifika ba sidadaun ne’ebé PNTL deskonfia envolve iha kazu, hodi foti nia deklarasaun ho identidade durante oras 12 nia laran.
“Ita-nia Departamentu Investigasaun Kriminál (DIK) halo de’it identifikasaun durante oras 12 nia laran, depois ita haruka fila fali, tanba sira la’ós autór ba kazu omisídiu iha Delta Elemloi, maibé tanba ita deskonfia, entaun ita bolu mai halo identifikasaun.
Alende ne’e nia dehan, parte PNTL la’ós halo identifikasaun ba joven na’in-rua de’it, maibé sira halo identifikasaun ba sidadaun hamutuk 23, kona-ba kazu Omisídiu iha Delta Elemloi.
“Ami PNTL servisu maka hodi buka autór Prinsipál ba kazu refere, nune’e rezultadu ikus ami sei publika liuhusi media, para públiku bele hatene koba autór Prinsipál,” nia hakotu.
Entretantu antes ne’e Komandante PNTL Munisípiu Dili, Superintendente Xefe Polisia Natérsia Eufrásia Soares Martins, hatete relasiona ho kazu ne’ebé akontese iha loron Sesta madrugada (06/01), ema deskoñesidu sona mate vítima ho naran Isac Sinarai da Costa, PNTL seidauk kaptura Autór Prinsipál.
“Kazu akontese iha Elemloi ne’e ita seidauk kaptura autór prinsipál, maibé daudaun ne’e ita nia membru PNTL sira sei halo nia prosesu ba kazu refere,” nia hateten iha knaar fatin Komandu PNTL Munisípiu Dili, Segunda (09/01).
Nia haforsa tan, Kazu Elemloi membru PNTL sira sei halo hela prosesu kona-ba kazu ida ne’e, hein katak sedu ou tarde sira-nia parte sei públika nia rezultadu ba públiku, maibé membru sira sei halo sira-nia servisu tuir prosedimentu ne’ebé iha.
“Kazu elemloi ne’e ita identifika ona ema balun ne’ebé sei responsabiliza ba krime, ha’u la bele ko’alia iha ne’e, tanba segredu justisa,” nia hakotu.
1,562 total views, 3 views today
Bele hare Video Seluk :
Subscribe to Timorpost
