ADVERTISEMENT

D. Leandro: “Forsa Sira Sempre Matan Moris Neon Na’in Fó Vijilánsia Ba Ita Nia Nasaun”

Marcos Fernandes - Baucau · Defesa no Seguransa · Munisípiu
Jornalista : Caetano Guterres
Editor : José Ximenes
  • Share
Dom Leandro Maria Alves foto hamutuk hafoin misa komemorasaun aniversariu F-FDTL Komponente Terrestre ba dala-21 iha antigu Lanud Baukau. Foto TP/Caetano Guterres

BAUKAU—Bispu Dioseze Baukau, Dom. Leandro Maria Alves fó korajen nafatin ba Falintil-Forsa Defeza Timor-Leste (F-FDTL) atu espíritu forsa defeza ne’ebé hatuur iha lema “Honra Patria ao Povo” atu fo nafatin konfiansa ba povu iha kualkér situasaun.
Dom. Leandro prezide misa komemorasaun F-FDTL Komponente Terrestre Baukau ba dala-21, domingu (3/12) iha antigu Lanud (sigla melayu – Pangkalan TNI Angkatan Udara) Baukau.
Iha nia omilia, bispu Baukau hateten, evanjellu domingu ne’e nia, Jesus hateten ba nia apóstolu sira atu matan moris neon nain. Mensajen Jesus nian ba apóstolu sira iha relasaun ho aniversáriu forsa ninian ne’e kro’at teb-tebes.

“Matan moris neon nain ne’ebé Ita Na’in Jesus Kristu fo mai ita (sarani) dehan matan moris neon nain, hare ba liafuan ida nee ita bele dehan liafuan ida kro’at tebe-tebes hodi ita selebra hamutuk iha fatin ida nee. Iha nee forsa sira sempre matan moris neon nain fo vijilánsia ba ita nia nasaun,” dehan D. Leandro.
Dehan D. Leandro, liturjia ohin hahú primeira semana Adventu ninian katak tempu Adventu tempu esperansa ninian katak tempu ksolok ninian.
“Ksolok tanba Na’i Maromak halo An ba Ema no hela iha ita ema nia leet, iha momentu Anunsiasaun nian anju dehan: ‘Rahun Di’ak Haksolok’. Iha kántiku nain feto nian, Maria dehan Hau Klamar Haksolok Iha Hau Na’i Maksoin,” esplika D. Leandro.

ADVERTISEMENT
SCROLL FILA BA NOTISIA


Lee Mós :
Komandu Komponente Naval Tula Boina Mariñaria ba Grumete Na’in-140

Amu Bispu dehan, primeiru domingu Adventu nee fo hanoin ba sarani sira kona ba povu Israel ne’ebé dehan la moris tuir promesa ne’ebe sira halo tiha ona, povu ida neebe fuan toos, rebelde, indiferente. Povu ida ne’ebé la kumpre nia promesa neebe halo tiha ona, povu ida infiel.
Hahalok povu Israel ninian nudar buat fo’er, hahalok diak sai tiha hanesan hena fo’er.
“Husi parte seluk ko’alia mai ita katak Maromak ko’alia mai ita nudar Aman no nudar Redentór, nudar Aman Maromak halao nafatin ninia funsaun atu proteje, liberta povu Israel husi sala no nudar Redentór, Maromak salva nia povu no halo sira sai povu foun ida. Tanba nee iha primeira leitura konvida sarani sira atu rekoñese katak Maromak mesak de’it mak ita nia we matan moris nian. So Maromak mesak de’it mak salva ita, ita mesak labele salva ita nia an, ita mesak labele hasai ita nia an rasik husi ita nia hahalok egoísta, violénsia, injustisa sira,” dehan bispu Baukau.

Bispu Baukau nee afirma, presiza duni Maromak ninia tulun, Maromak ninia grasa, iha nee ita nia vida espirituál hanesan ema sarani, ema ne’ebé fiar iha Na’i Maromak, ita labele husik ita nia an.
“Hanesan ema sidadaun, ita bele dehan liafuan ida nee mós fo hanoin mai ita atu ita mos tau ita nia konfiansa ba ita nia forsa (F-FDTL) sira tanba sira mak sai hanesan ita nia lutu ida ne’ebé mak proteje povu sira no fo hakmatek ba ita nia povu sira,” amu subliña.

Lee Mós :
Ministériu Defeza Presiza Tau Atensaun ba Membru F-FDTL Idade Avansadu

Bibi atan dioseze Baukau nee haktuir segunda leitura S. Paulo dehan “keta dukur keta toba”, katak hateke ba ita nia an, liu-liu forsa sira ka seguransa nasaun ninian buka atu hatur an nafatin, tuir lema F-FDTL nian iha hirus matan “Honra Patria ao Povo” lema ida nee tenke ser sai iis espíritu forsa ida-idak nian.
Ne’e duni bele dehan dignidade forsa ida nian, hatur iha, oinsa mak hamoris lema “Honra Patria ao Povo” tanba nee mak bele dehan, riin nasaun nian buka atu moris iha ita nia promesa, kompromisu sira, fó seguransa ba povu no servi povu. Atividade forsa nian mós ema hare liu husi oinsa ita realiza ita nia dignidade tuir promesa ne’ebé ita iha, iha ita nia atuasaun sira loro-loron ninian.
“F-FDTL Komponente Terrestre Baukau eziste tinan 21 ona, hatudu katak instituisaun ida nee adultu los ona. Adultu iha atuasaun sira, adultu iha relasaun ho ninia povu tanba nee mak povu ka nasaun nee tau konfiansa tomak iha forsa sira, atuasaun ne’ebé loos, la’o tuir promesa forsa nian, hatudu dignidade iha povu nia leet no iha Na’i Maromak nia futar oin,” amu dehan.
“Bainhira ita hala’o ita nia knar sira ho neutru no profisionál sira ho firme no domin, ita hatudu hela ita nia relasaun ne’ebé mak di’ak ho Na’i Maromak no iha maluk sira, nee mak Sao Miguel Arcanjo mahein ba ita boot sira. Santo ida nee kontra buat ne’ebé mak la di’ak, kontra diabu, ne’e duni ita boot sira mos ho espiritu santu Sao Miguel Arcanjo ninian, ita bele dehan Sao Miguel Arcanjo sai hanesan ezemplu ida atu ita boot sira banati tuir,” amu fo hanoin.
Lider dioseze Baukau ne’e hateten, prezensa forsa nian iha povu nia leet hetan louvór, povu sente hakmatek. Ne’e hatudu katak rezultadu pozitivu no sai ezemplár atu povu moris seguru ho prezensa forsa ninian.
Hafoin misa aniversáriu remata Bispu Dioseze Baukau fo bensaun ba transporte F-FDTL komponente terrestre hamutuk 12 kompostu husi ambulánsia iha ida (1), Isuzu (4), mini icon (3), tanke bee (2) no baskulante iha rua.(#)

 855 total views,  6 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “D. Leandro: “Forsa Sira Sempre Matan Moris Neon…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No