BAUKAU-membru Polisia Nasionál Timor Leste (PNTL ) eskuadra Venilale ajente xefe Moises hetan tuda kanek husi ema deskoñesidu iha area suku Uailili postu administrative Baukau vila bainhira akompaña militante partidu CNRT fila husi kampaña atu ba fali Venilale.
“Tuir kronolojia akontese, iha loron 23 militante partidu CNRT partisipa kampaña iha Baukau vila bainhira fila rai nakukun tuku hitu, too iha igreja Uailili ema deskoñesidu tuda militante sira, hamosu tuda malu estraga ita nia komunidade nia uma hitu hetan estraga kmaan inklui tuda kona ita nia membru PNTL ida ne’ebé halo seguransa akompana hetan tuda kanek iha ulun” dehan komandante PNTL munisipi Baukau superintendente xefi Antonio Maria De Sa ba Timor Post Tersa feira (25/4) lokraik iha nia knar fatin.
Nia esplika, husi akontesimentu konsege identifika ona suspeitu na’in rua tanba iha serbisu kooperasaun husi autoridade suku, OPS ho komandu PNTL munisipiu, daudaun nee iha hela prosesu investigasaun.
Atuál komandante munisípiu Baukau nee afirma, durante tempu kampana hahu husi loron 19 mai too loron 23 komandu polisia konsege prende motor sia ne’ebé uza kanu resin tanba lei eleitorál bandu atu motorista sira uza kanu resin iha tempu kampaña.
“Hahú husi kampaña loron dahuluk partidu PLP ho Fretilín buat hotu la’o di’ak iha infrasaun maibé tama iha loron 23 kampaña partidu CNRT nian mak ita konsege prende motor sia tanba militante sira uza kanu resin, daudaun nee sira selu koima dolar hat nulu ba leten no ita orienta kanu resin hasai hotu kedas” nia informa.
Eis komandante PNTL munisípiu Kovalima nee haktuir maski akontese asidente no insidenti balun maibé sidadaun sira, liu-liu joven sira barak mak iha ona komprensaun tanba nee husu atu kontinua mantein situasaun nee durante no depois too eleisaun (gut)
2,778 total views, 6 views today
Bele hare Video Seluk :