Obrigado: Fiar No Gratidaun ‘Hamrík, lao ó nian ba! O nia fiar mak soy ó’!

(Reflexaun ba domingo XXVIII tempo komun nian. 2Rs. 5, 14-17; Sal. 97(98); 2Tim. 2, 8-13; Lc. 17, 11-19).

Husi: Luis Pereira, SJ

SCROLL FILA BA NOTISIA

Ita tama ona ba domingo 28 tempo komun nian. Liturjia domingo ida ne’e nian, konvida ita hotu atu reflete konaba FIAR ne’ebé exprexa iha forma GRATIDAUN ba buat diak tomak ne’ebé ita simu ona, simu dau-daun no sei simu husi Naí Maromak no ema seluk. Hahu kedas husi iss moris, anin, loron, inan-aman, maun-alin, vizinhos no seluk tan.

Jesus, iha nia dalan ba Jerusalem. Nia passa entre cidade Samaria no Galileia. Iha ne’ebá, leprozo nain 10 ba hasoru nia. Sira husu atu nia kura sira. Lepra mak moras át ida iha tempo Jesus nian. Ema nia isin kanek sai át hotu. Sira lakon forma. Sira ne’ebé hetan moras ne’e, ema exklui sira husi moris loro-loron nian iha sociedade. Sira sai ema marjinalizado, alienado husi familia, sociedade no an rasik. Tan ne’e, sira mesak deít ema ne’ebé lakon dignidade, lakon valor tratamento no konsiderasaun núdar ema. Nuné, sira sofre fisikamente, mentalmente no phisikolojikamente. Tambá ne’e, sira hakbesik an ba Jesus, mediko divino, mestre no konsolador atu restsura hikas fali sira nia dignidade; atu nia kura no fo kmán ba sira husi sira nia moras isin nian no fo ba sira konfiansa atu fila hikas ba moris normal iha sociedade.

Lee Mós :

Firaku-Kaladi “Fratelli Tutti” (II – filosofia política): Preâmbulo dehan “... desenvolvimento de uma sociedade solidária e fraterna”

Ponto 3 ita bele medita, reflete no aprende hamutuk:

Fiar: senha/pasword grasa nian!

Fiar núdar sandi/pasword/senha ida ba ita ema sarani atu bele asesu ba rede Lalehan nian. Iha buat kmanek barak ne’ebé Naí Maromak hatudu ona, hatudu dau-daun hela no sei hatudu ba ita ida-idak. Maibé, dala barak ita la konsegue kapta nia mensazem sira no goza nia kmanek(grasa) sira. Basá, ita la hatene sandi/pasword ne’e. Nuné, ita preciza konstroi uluk sandi/pasword ne’e, atu bele posibilita ita ba grasa sira be ita dehan ne’e.

Iha leitura dahuluk husi Livro Liurai sira nian no husi Evanjelho Saun Lukas, haktuir oinsa estrajeiro nain rua: Jeneral leprozo Naamã no leprozo Samaritano hatudu sira nia fiar ba Maromak Israel nian liu husi profeta Eliseu no Jesus Nazaré. Sira hetan kura husi sira nia moras no sira hahí, adora Naí Maromak. Kura ne’e, bele akontese tambá sira iha fiar. Tambá fiar ne’e, sira nain 2, bele hetan asesu ba ksolok lalehan nian. Fiar liberta ema. Sira goza hikas ‘libertasaun’. Fiar soy sira. Jesus dehan ba leprozo Samaritano: hamrík, lao ó nian ba! Ó nia fiar mak soy ó!. Oinsá ho ha’u nia sandi/pasword?

Gratidaun: fuan agradecido!

Iha buat barak los, sura labele iha moris ne’e, ne’ebé ita simu gratuitamente no ita preciza agradese hanesan iss moris, dom sira, domin, anin, inan-aman, maun-alin, vizinhos nst,. Dala wain ita rona lia-fuan ‘obrigado’ ou agradese. Ne’e expresaun gratidaun nian ida. Agradecimento núdar valor ida ne’ebé hola parte ona iha ita nia moris. Nia sai ona ita nia valor familiar, kultural no eklesial.

Lee Mós :

Demonstrasaun AMN Kontra PN Nia Desizaun Sosa Karreta Lux Sport No Laptop: Racionalidade Polítika Vs Moralidade Polítika

Sei kík, ita aprende ona husi inan-aman atu hateten obrigado. Ita hetan treino atu agradese ba ema sira ne’ebé tulun ita; ba ema sira ne’ebé fo prezente ba ita; ema sira ne’ebé halo diak ba ita; no liu-liu ba ema sira ne’ebé tulun ita iha tempo susar no tempo terus laran nia laran. Ita agradese ba sira ne’ebé fo hahan ba ita no ba sira ne’ebé loke odamatan festa nian ba ita. Hanesan leprozo nain 10 haktuir iha evanjelho, so nain ida deít mak hatene agradese ba grasa ne’ebé nia simu.

Dala barak, ita simu grasa/diak oi-oin. Maibé, ita haluha no la hatene agradese. Ita haluha no la hatene agradese, tamba ita fraku ou laiha fiar. Basá, husi fiar mak moris atitude gratidaun ne’ebé sincero. Se lae, ita dehan obrigado, agradese, maibé abut laiha, la mai husi fuan no nia sai formalidade deít. Saida mak ita preciza atu agradese ba?

Jesus-Kristo: Lia-Fuan!

Iha Eukaristia, ita hatudu fiar ba Maromak hodi agradese ba Maromak Oan ne’e mai fo nia moris rasik atu soy ita husi mate rohan laek. Ho Nia, Maromak nia Lia-Fuan enkarnada, ita bele goza grasa sira lalehan nian. Iha Nia, ita hetan salvasaun. Tan Nia, ita hetan kura tamba Nia mak mediko divino. Hodi Nia, ita sai ida deit ho Maromak: komunhaun no uniaun ho Maromak no maun-alin sira: moris no mate. Nuné, ita nia fiar expresa iha ema: pessoa Jesus-Kristo nian. Ida ne’e mak Saun Paulo haklaken iha nia surat ba Timóteo iha leitura daruak. Jesus kristo mak Lia-Fuan Aman Maromak nian. Nia mak ita nia senha/sandi/pasword atu hetan asesu ba Aman Maromak/Lalehan. Iha Nia no ho Nia mak ita bele hetan sentido lolós husi ita nia gratidaun sira.

Lee Mós :

Padre José Siquera: Tulun Malu hodi Hetan Maromak Nia Bensaun

Mai ita aproveita domingo ida ne’e, hodi konstroi no haklean ita nia fiar, hamanas no fo sentido ba ita nia agradecimento sira. Atu nuné, ita bele lao ba oin iha konforma-an ho Jesus-Kristo iha Espirito Santo. Ho lia-fuan seluk, ita hakbesik-an ba ‘ilas no lalatak/imagem e semelhança’ Maromak nian: orizem kriasaun nian. Só nuné deít mak ita bele hananu ho Salmista: Iha povo sira oin, Maromak hatudu maksoin. Amen! (lupersj)

(Hakerek nain Jesuíta, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)

3,241 total views, 3 views today

Oinsa Ita nia Reaksaun iha Notisia Nee?