Timor Post (09/04/2021)- Prezidente Konsellu Administrasaun Bee Timor-Leste (KABTL), Carlos Peloi husu ba komunidade ne’ebé seidauk asesu ba moos atu pasiénsia uitoan tanba impaktu hosi inundasaun sistema abastesimentu bee mós estragus kuaze porsentu 40-50.
“Iha loron 4 fulan Abríl inundasaun iha rai laran afeta buat barak inklui mós ita nia sistema bee iha Dili laran. Iha loron hirak sira halo observasaun iha terenu sira hare kuaze 40% to’o 50% sistema bee at hotu, ne’e inklui bee sira ne’ebé mak foti kaptasaun husi mota no bomba sira iha Dili laran”, informa Peloi bá Jornalista sira iha Ministériu Finansas Ai tarak-Laran, sesta (09/04).
Autoridade ne’e akresenta bomba bee iha Dili laran kuaze 26 a’at hotu, maibé ita koopera ho EDTL normaliza fali ahi, iha fatin balun to’o ohin loron ita konsege rekupera fali bomba 10.
Hatán ba komunidade sira ne’ebé la hetan bee Prezidente hatete, autoridade sira instala tanki iha fatin sira ne’e depois komunidade sira bele asesu.
Ba área sira ne’ebé mak seidauk tau tanke KABTL servisu hamutuk ho bombeirus ba para iha ne’ebá mak komunidade sira enxe de’it, tanba kapasidade atu responde ne’e naton entaun KABTL la konsege responde ema hotu-hotu nia preokupasaun.
“Ha’u husu deskulpa ba inan aman sira karik balun to’o ohin loron seidauk asesu karik pasiénsia uitoan ami sei esforsu hodi rezolve”, Peloi husu.
Prezidente Konsellu ne’e konfesa bee balun ne’e nia kondisaun ne’e at tebes, ne’ebé atu rekupera ne’e presiza tempu.
“Ami presiza tempu dala ruma to’o fulan ida no fulan rua ho balun mak atu rekupera fali, tanba kuaze 40 to’o 50% mak at, ne’e ita tau ba osan karik ita lakon kuaze 2.5 milloes hosi afetasaun inundasaun ida ne’e” subliña.
To’o oras ne’e tanke ne’ebé instala ba komunidade sira maka iha area Bidau Mota Klaran Bekusi, maibé KABTL sei esforsu hodi monta iha fatin sira ne’ebé mak komunidade presiza.
Jornalista Jaime Pires
Editor Mariano Martins
645 total views, 3 views today
Bele hare Video Seluk :