DILI—Arguida ho inisiál ST, Kinta (16/03), tenke ba hatán iha Tribuna l Distritál Dili, tanba halo agresaun fíziku hasoru lezadu CP hanesan laen.
Tuir akuzasaun husi Ministériu Públiku, katak iha loron 26 fulan Jullu tinan 2022, arguida husu ba lezadu atu fó hariis sira nia oan, tanba arguida moras hela, maibé lezadu fó hari fali oan ida defisiente husi lezadu nia feen boot nian.
Ho ida nee halo arguida nervozu no la simu, hodi tuku dala barak iha lezadu nia kotuk laran, inklui tuku dala barak iha lezadu nia ulun.
Konsekuénsia husi arguida nia hahalok ne’e, halo lezadu sente moras iha ulun no iha kotuk laran. Arguida nia hahalok nee halo ho forma livre, deliberada no konsientemente katak lori liman tuku ema ne’e moras, tanba deit motivu la fó hariis labarik kiik.
Nunee ho hahalok arguida nian nee, Ministériu Públiku akuza arguidu hanesan autór material ba krime violénsia doméstika ho forma ofensa integridade fízika simples, neebé previstu iha artigu 145 husi Kódigu Penal.
Hatán ba akuzasaun husi MP nian nee, arguida konfesa ba tribunal, katak tuku dala rua iha lezadu nia ulun, inklui dala rua iha kotuk laran.
“Hau tuku dala rua iha ulun, dala rua iha kotuk laran, lezadu mak tuku hau nia ibun ran, hau atu monu mak sadere de’it ba parede, lezadu nia oan mane ida rasta ha’u ba sori no mane ida seluk tuku ha’u nia ulun”, nia deklara iha sala julgamentu.
Arguida dehan, hafoin problema nee akontese, nia parte ba halo tratamentu iha sentru saúde Komoro, tanba ibun ran.
Alende nee, lezadu mós konfesa ba tribunal, katak iha altura neebá nia fó hariis hotu labarik sira, no kous hela labarik kiik tinan ida, hodi ba bolu nia oan ida ho kondisaun defisiente, mak arguida tuir ba hodi tuku dala barak iha kotuk laran no ulun. Ho ida nee mak lezadu hikis liman kona iha arguida nia ibun ran.
“Ha’u la tuku, tanba ha’u kous hela labarik ida ki’ik ne’e, no ha’u bolu ida defisiénsia ne’e, tanba defisiénsia ne’e nia tilun diuk, bolu nia tenke ba besik mak foin rona”, nia deklara ba tribunal.
Nia hatete, husi problema ne’e arguida mós ba hela tiha nia maun sira iha Kampun Baru, liu tiha loron tolu mak arguida ho nia maun sira tun fali ba uma hodi deskulpa ba malu.
Entretantu, iha alegasaun ba kazu nee, Prokuradór Naplião Soares da Silva, solisita ba tribunal atu aplika pena prizaun fulan tolu no suspende nia ezekusaun ba tinan ida, tanba arguida nia hahalok nee prienxe duni elementu krime ofensa integridade fízika simples ho forma violénsia doméstika.
Maibé parte defeza husu ba atu aplika pena neebé mak justu no adekuadu ba nia kliente, tanba arguida konfesa imparsialmente ba faktus,
Hafoin rona tiha alegasaun nee, tribunal deside adia hikas julgamentu nee ba loron 30 fulan nee, hodi submete ba desizaun ikus.
Audiénsia julgamentu nee prezide husi juis ba prosesu José Gonçalves, Ministériu Públiku reprezenta husi Prokuradór Napoleão Soares da Silva, no arguida hetan asisténsia legal husi Defensór Públiku na’in ida.
1,186 total views, 3 views today
Bele hare Video Seluk :
Subscribe to Timorpost
