DILI (timorpost.com) — Advogadu Privadu ne’ebé apoiu hosi Lider Nasionál Kay Rala Gusmão, ba vítima hosi kazu rai iha Bekusi, Suku Bekora, Postu Administrativu Kristu Rei, Munisípiu Dili, sei levanta prosesu foun hasoru Autór.
Tuir Advogadu Privadu, Miguel Acácio Faria, nia parte mai iha ne’e halo observasaun no akompaña prosesu, maibé atu halo prosesu foun hasoru Tribunal nia parte la bele ko’alia, maibé prosesu rua mak nia sei halo.
“Relasiona ho kazu Bekusi ne’e, prosesu iha rua mak atu halo, prosesu foun kontra autór ne’e, ida seluk halo rekursu anula desizaun Tribunal Rekursu nian,” nia hateten ba Timor Post, hafoin halo observasaun ba uma-kain 7 iha Bekusi, Kuarta (01/02).
Nia dehan, sei halo prosesu foun hasoru autór tanba deskonfia halo falsifikasaun dokumentu ba Tribunál hodi hasai uma-kain hitu iha ne’e.
“Ha’u la’ós advogadu titular ba kazu ida ne’e, maibé doutór Manuel Tilman, mak advogadu titular, tanba ne’e nia bele esplika kona-ba prosesu ba kazu ne’e,” nia dehan.
Alende ne’e nia haktuir, deklarasaun horisehik, Lider Nasionál Kay Rala Xanana Gusmão, ko’alia ho jerasaun Vicente Vidigal ho Vicente Vidigal nia feton.
“Autór ne’e oan hakiak de’it, tanba ne’e ita halo prosesu kontra fila fali nia, mais oan rasik no jerasaun rasik husi Vicente Vidigal ne’e la halo reklamasaun kona-ba rai ida ne’e,” nia konta.
Jerasaun husi Rai na’in aseita sira-nia Avó Vicente Vidigal, entrega rai ba família uma-kain 7 ne’e, mais oan hakiak ne’e halo prosesu kontra fali sira, maibé tuir dalan legal jerasaun husi Vicente Vidigal, mak iha direitu atu halo reklamasaun, nia kuandu la halo, oan hakiak mós labele halo buat ida.
Enkuantu tuir dadus uma-kain 7 ne’ebé atu sai vítima ba desizaun Tribunál ne’e ho total membru família 101, kompostu husi mane 54 no feto 47.
2,686 total views, 6 views today
Bele hare Video Seluk :
Subscribe to Timorpost
