Timor Post (07/10/2020)—Orsamentu Jerál Estadu (OJE) tinan 2020 ba Ministériu Defeza (MD)- FALINTIL-Forsa Defeza Timor-Leste (F-FDTL) no Ministériu Interior (MI) inklui Polísia Nasionál Timor Leste (PNTL) aprovadu ona iha faze espesialidade.
Rezultadu votasaun em-bloku ba orsamentu MD-F-FDTL, votus a-favor 43, kontra zero (0) no abstensaun-21. Enkuantu rezultadu votasaun ba orsamentu MI, votus a-favor 43, kontra-3 no abstensaun-17 no rezultadu votasaun ba PNTL, votu a-favor 43, kontra-0 no abstensaun 21.
Total orsamentu ba Ministériu Defeza inklui F-FDTL 21.494, Ministériu Defeza $ 4.840, fahe ba kategoria saláriu vensimentu $ 1.163, bens serbisu $ 3.678, No ba transferénsia publika, kapitál menór no kapitál dezenvolvimentu laiha.
Ba gabinete ministru $ 891, diresaun jerál $ 28, gabinete inspesaun auditoria $ 37, diresaun nasionál administrasaun finansas $ 796, diresaun nasionál planeamentu estratéjiku internasionál defeza $ 964, diresaun nasionál aprovizionamentu $ 278, diresaun nasionál jestaun patrimóniu $ 1.739 no diresaun nasionál rekursu umanu $ 108.
Enkuantu orsamentu ba FALINTIL- Forsa Defeza Timor-Leste ho montante millaun 16.653, ba saláriu vensimentu $ 8.613, bens serbisu $ 8.040, transferénsia publika, kapitál menór no kapitál dezenvolvimentu laiha.
Iha aprezentasaun proposta ba Ministériu Interior, deputadu sira aprezenta proposta aliterasaun rua, hanesan proposta númeru 33 no proposta númeru 34, maibé bainhira halo votasaun ba proposta rua ne’e, proposta númeru 34 ne’ebé mak aprezenta hosi proponente deputadu José Agostinho Siquira “Somotxo” ho deputada Maria Rangel mak pasa ho rezultadu votasaun a-favor 42, kontra-4 no abtensaun-17. Maibé proposta númeru 33 ne’ebé mak aprezenta hosi deputadu Bankada Opozisaun, ne’ebé hakarak hasai osan viajen estranjeiru hosi MI nian la pasa.
Tuir Justifikasaun hosi proposta númeru 34, hakarak retira 900 mill hosi dotasaun orsamental transferénsia publika, Gabinete Sekretáriu Estadu Protesaun Sivíl, para reforsa valor dotasaun kategoria Bens Serbisu iha Sekretáriu Estadu ne’e ho dotasaun 2,4 mill. No verba adisional ne’e, atu hola bens alimentár, bens la’ós alimentár, material konstrusaun, para atende armazen Protesaun Sivíl hodi apoiu populasaun sira ne’ebé hetan afetadu ba inundasaun iha fulan Marsu no Abril tinan ne’e.
Deputadu Proponente, José Agostinho Siquira “Somotxo” hatete, proposta ne’ebé mak hato’o, rezulta hosi prosesu audiénsia ne’ebé mak antes ne’e komisaun B halo ho Sekretáriu Estadu Protesaun Sivíl.
“Justifikasaun sumária, ha’u hanoin la iha duvida, tanba tempu udan mós besik daudaun, stock iha armazein mós la iha, tan ida ne’e mak Sekretáriu Estadu Protesaun Sivíl aprezenta preokupasaun ne’e mai komisaun B iha audiénsia para atu muda osan 900 mill ne’e ba bens serbisu, para fasilita sira halo kompras”, dehan Somotxo iha diskusaun espesialidade iha sala plenári PN, kuarta (07/10).
Vise Ministru Interior, Antonio Armindo, hatete, osan ne’ebé mak tau iha viajen estranjeiru atu selu dívida sira.
“Loos duni ami tau montante iha viajen estranjeiru, tanba atu uza para hodi selu dívida ne’ebé mak iha, divida ne’e mai hosi ita nia sekretáriu estadu sesante, uluk halo viajen ba Australia iha 2019, no mós ita nia DJ imigrasaun ho nia xefia na’in haat ba Cabu Verde, tanba ida ne’e mak ita tau montante ne’e para atu selu. Iha $15 mill ita tau iha Gabinete Ministru, hanoin dehan katak atu viajen iha fulan Dezembru nia laran, para atu ba kolia asuntu seguransa nian ho Indonesia, mais tanba COVID, ida ne’e ami konsidera bele koa, mais restu ami husu atu mantein hodi bele ita nia dívida”. Antonio dehan.
Sekretáriu Estadu Protesaun Sivíl, Joaquin Gusmão, hatete, sira hakarak muda osan 900 mill ba bens serbisu hodi bele responde ba apoia emerjénsia bens alimentares no non-alimentares no mós material ba konstrusaun ba vítima dezastre naturais ne’ebé mak atu antesipa iha tempu udan kada tinan- tinan akontese.
“Ami tau osan iha ne’ebá para bele asegura sasán iha armazein, tanba ita hatene katak ita nia dezastre naturias ne’ebé mak akontese iha fulan hirak liubá, esgota tiha ita nia sasán sira ne’ebé mak ita rai iha armazein, ita presiza re-stock fali. No dadus ne’ebé mak ami konsege rekolla hosi Janeiru to Setembru, total vitima dezastre naturais hamutuk hotu uma kain rihun hitu atus hitu limanulu resin lima, sira ne’e hotu ita ajuda ona apoiu emerjénsia bein alimentares no non-alimentares nian. Uma kain rihun ida atus ualu hitunulu resin lima mak simu ona material konstrusaun hodi bele harii hikas fali sira nia uma”, Joaquin informa.
Entretantu, total orsamentu ba Ministériu Interior inklui PNTL ho montante millaun $ 45.990. Ministériu Interior $13.759, fahe ba iha kategoria saláriu vensimentu $ 5.981 bens serbisu $ 5.879, transferénsia publika $1.900, kapitál menór no kapitál dezenvolvimentu laiha.
Ba Gabinete ministru $ 363, Gabinete vise Ministru $ 87, Gabinete Sekretariu Estadu Protesaun Sivil $ 4.691, Diretór Jerál Serbisu Korporativus $ 115, Gabinete Inspesaun Auditoria $ 104, Diresaun nasionál administrasaun finansas $ 330, Diresaun nasionál lojístika jestaun patrimóniu $ 94, Diresaun nasionál seguransa patrimóniu públiku $ 5.370, Diresaun nasionál prevensaun konflitu komunitariu $ 231, Diresaun nasionál aprovizionamentu $ 138, Serbisu migrasaun millaun $ 1.641, Diretór jerál serbisu operasionais $ 180, Gabinete assesoria $ 51, Diresaun nasionál rekursu umanu $ 71 no Diresaun nasionál protesaun sivíl $ 295.
Enkuantu , orsamentu ba iha Instituisaun PNTL ho montante $ 32.230, fahe ba kategoria salariu vensimentu millaun 16.641, bens serbisu millaun $ 15.350 , kapitál minor $ 240 no transferénsia publika no kapitál dezenvolvimentu laiha.(Jornalista : Julio Salinas Soares)
894 total views, 3 views today
Oinsa Ita nia Reaksaun iha Notisia Nee?
You have reacted on “Orsamentu ba MD-F-FDTL no MI-PNTL Aprovadu, Ver…”
Bele hare Video Seluk :
Subscribe to Timorpost1
/
2002
CALEMA "LA MAI TL SENTI LAKON HISTORIA IHA SIRA NIA MORIS"
IZLÁMIKU NO PROTESTANTE REKOÑESE TOLERÁNSIA IHA TIMOR NE’E ÚNIKU
PM XANANA: DEZENVOLVIMENTU TENKE HADI'A SIDADE DILI
1
/
2002
