DILI (timorpost.com) – Prezidente Repúblika, José Ramos Horta no Lider Istóriku, Kay Rala Xanana Gusmão, observa direta fatin inséndiu Kuarantena Tera Santa no vitima sira iha edifísiu Bombeiros Komoro.
Líder Na’in rua, deside muda provizóriamente vítima hamutuk uma-kain 43 ba Coby House iha Palásiu Prezidensiál Aitarak-laran nia kotuk, maibé família 7 seluk deside hela ho família iha Komoro no Tasi tolu.
Vítima sira ne’ebé evakua husi Komoro mai fatin provizória, hetan mós asisténsia médika husi pessoal saúde sira, liuliu ba inan isin rua no labarik.
Xefe Estadu husu vítima sira ba hela provizóriu iha fatin seguru ne’ebé ekipa prepara, hodi hein intervensaun Governu.
“Ha’u ho Avó Nana vizita ona ba imi-nia fatin haree ahi han motuk, imi bele muda fali lai ba fatin ne’ebé ekipa prepara provizóriu hodi asegura kondisaun ba inan no labarik sira,” dehan PR Horta ba vítima sira.
Hafoin konversa, Xefe Estadu no Xanana orienta kedas ekipa hodi tula vítima sira muda ba uma koby house no buka ajuda mós família balun ne’ebé deside fila ba hela ho sira-nia família.
Entretantu, Xefe Aldeia Terra Santa Tasi Tolu, Esperança de Jesus hato’o agradese ba PR Ramos-Horta no Avo Nana bele vizita no haree rasik vítima sira-nia kondisaun, inklui buka solusaun ba vítima sira.
Autoridade Lokál ne’e kontinua koordena ho Xefe Suku Madohi, Bernardio de Cristo Ferreira, ho Governu atu hamos hikas fatin ne’ebé ahi han mutuk iha tempu besik.
2,961 total views, 3 views today
Bele hare Video Seluk :