DILI (Timorpost.com)–Deputadu husi Partidu Libertasaun Popular (PLP) iha Parlamentu Nasionál, Adolfo Martins, preokupa Sekretáriu Finansas apoiu Suku foun ne’ebé foin daudauk IX Governu rekruta, barak la hatene uza komputadór.
Preokupasaun husi deputadu ne’e, liga ba pesoál funsionáriu Sekretáriu Finansas Suku Hurahou, Postu Administartivu Hatulia B, Munisípiu Ermera ne’ebé la hatene uza Komputadór.
“Ofisiál Finansas Suku responsavel ba prestasaun apoiu ba Xefe Suku kona-ba jestaun finansas Suku nian, maibe nia rasik la hatene kona ba utilizasaun komputadór iha servisu apoiu suku nian ne’e problema”. Hateten Deputadu PLP ne’e liu husi Reuniaun Plenária Parlamentu Nasionál, Segunda (10/06).
Deputadu PLP ne’e sente preokupadu, tanba ida ne’e sei prejudika komunidade sira ne’ebé atu ba trata dokumentu iha suku laran. Se Sekretáriu Administrasaun Suku de’it la hatene uza komputadór oinsá nia atu trata dokumentu komunidade nian liuhosi komputadór.
Iha dekretu-lei Nú:6/2014, loron 26 fulan-Fevereiru, kona-ba rekursu materiais no insentivu Finanseiru Lideransa Komunitária sira, no kria servisu administrasaun Suku nian.
Servisu Administrasaun Suku kompostu husi Sekretáriu Administrasaun Suku, Ofisiál Administrasaun Suku, Ofisiál Finansas Suku no Ofisiál Asuntu Sosiál Suku.
Sekretáriu Administrasaun Suku responsavel ba diresaun no supervizaun ba atividade sira ne’ebé hala’o husi ofisiál administrasaun, finansas no asuntu sosiál sira, hodi garante katak sira halo tuir instrusaun no orientasaun sira Xefe Suku nian no hetan remunerasaun mensál dolar amerikanu hamutuk 170.00 USD.
633 total views, 3 views today
Bele hare Video Seluk :