DILI, (Timorpost.com)—Diretór, Kompañia Hoven II, Amaro da Costa “Susar” Kinta (23/05) presta deklarasaun iha Departamentu Investigasaun Kriminál Nasionál (DIKN), liga ho gravasaun ne’ebé viral iha sosiál media sadik governu no abuza Xanana.
Amaro da Costa “Susar” ba jornalista sira klarifika, kona ba gravasaun ha’u halo duni, maibé konaba publika no viral iha sosiál media ne’e la’ós nia parte mak publika.
“Ha’u ko’alia kona ba ami nia projetu ne’ebé ami nu’udar empreza hala’o, maibé la’ós intensaun publika iha media sosiál. Tuir ha’u nia voice ne’e, ha’u nunka fó sai iha media sosiál, maibé derrepente viral iha publika dehan ha’u sadik governu no abuza Xanana. Xanana ha’u nia aman ba nasaun, hanesan veteranu ha’u nia aman ba nasaun, ha’u la kontra, ha’u kontra ida ne’ebé tuur iha ministru ne’ebá, sira mak halo fo’er Xanana nia naran, ohin loron ema tolok Xanana no tolok veteranu, maun boot Xanana ha’u respeitu, ne’e ha’u nia aman ba nasaun la iha Xanana no la iha RDTL Timor, maibé ha’u defende Xanana too mate no ha’u defende Timor too mate, tanba ha’u ema Timor oan,”” dehan Amaro da Costa ba jornalista sira hafoin presta deklarasaun iha DIKN.
Nia konta katak, buat ne’ebé halo la satisfás mak liga ba projetu barak too ohin loron pending no Ministru Obras Publika prioridade liu ba kompañia estranjeiru duke kompañia lokál.
“Too agora, sira pending hela ho polítika ne’ebé ita la hatene. Tenderizasaun ba projetu sira ne’e hamutuk 62 no publika ona iha Jornál da Repúblika no hein atu asina kontratu de’it, maibé, ikus fali Ministru Samuel Marçal, konsidera liu kompañia estranjeiru, no la konsidera kompañia lokál. Projetu ne’ebé ita esforsu tinan 2017 too agora, ami empreza lokál lakon buat barak no gasta enerjia. Ikus fali Ministru, Samuel Marçal aprova no asina de’it kontratu ho kompañia estranjeiru de’it, la konsidera kompañia Timor, ida ne’e mak ha’u ko’alia, tanba osan aprova tinan-tinan aprova osan ba ita Timoroan, la’ós aprova ba Xina, “dehan Susar.
Susar haktuir, Samuel Marçal aprova no asina de’it kontratu ho kompañia estranjeiru xina no bainhira ema sira ne’e finaliza servisu lori osan ba nia rai ne’ebá, Timoroan hela ho kiak ba nafatin, tanba osan Timor nian la sirkula iha rai laran semo hotu ba ema nia rai.
“Ha’u husu ba Maun boot Kay Rala Xanana Gusmão nu’udar Primeiru Ministru, tau ema ba membru iha ne’ebá, tenke hare didi’ak, tau ema ne’ebé di’ak, no tau ema ne’ebé hatene servi ba povu ba rai ida ne’e, la bele tau ema ne’ebé mafiozu iha ne’ebá. Tanba ohin loron problema hela de’it, tanba la konsidera ema Timoroan ne’ebé iha nia rai rasik”.
Ministru sira ne’e, broker mak barak, sira fó osan para “ha’u, (Ministru)” asina, mais kompañia lokál mak ba ne’e, sira dehan hein lai, mais sira ministru asina nafatin. Nune’e hanesan Timoroan, kritika Samuel Marçal, nia tenke hadi’a lisan aat ida ne’e, sai Ministru atu servi ba povu, la’ós sai ministru atu servi ba Xina, la’ós Xina mak fó votus ba o tuur iha kadeira, tenke hanoin didi’ak ida ne’e.
“Ha’u susar ko’alia, hakarak defende buat los, o kaer ukun atu hadi’a vida nasaun, no hadi’a povu nia moris no hadi’a povu nia moris no hadi’a futuru, la’ós hadi’a o nia uma laran, ida ne’e korrupsaun, halo fo’er Xanana nia naran, ha’u mai iha ne’e, tanba dehan ha’u sadik Xanana no sadik governu, ha’u la sadik governu ha’u kritika para hadi’a, la’ós estraga ne’e lae, ha’u la sadik no ha’u la halo publikasaun video iha media sosiál, maibé ha’u nervozu, tanba Ministru la fó oportunidade ba komunidade lokál, maibé video ne’e ha’u mak halo duni, maibé publika iha media sosiál ne’e lae,” akresenta nia.
2,043 total views, 6 views today
Bele hare Video Seluk :
Subscribe to Timorpost
