DILI, (timorpost.com)—Prezidente Repúblika (PR), Jose Ramos Horta, hamutuk ho Ministra Edukasaun Dulce de Jesus, Kinta (18/04) ofisial loke programa Edukasaun Multilanguage ka EMULI nu’udar pilotajen, uza métodu sira ne’ebá rekoñesidu oinsá hanorin lian dahuluk la ofisiál nu’udar instrumentu efetivu atu permite oportunidade ba susesu ba labarik.
Prezidente Horta, nian entrevista hatete, programa Edukasaun Multilanguage ka EMULI, presiza fó apoiu tanba iha estudu lubu ida iha mundu hanesan iha Papua New Guinea, Mexico no Brazil grupu étiku no linguístiku barak la ko’alia lingua nasionál, atu hanorin labarik no komunidade sira nia lingua materna rasik, sira hanoin oinsá, hanorin kedas ho lingua Portuguese, tetun ka oinsá, entaun tékniku no sientista sira hare di’ak liu hanorin sira nia lingua materna, tinan rua ka tolu nia laran, entaun Sira hatene hakerek ona, entaun sira hakerek hotu-hotu ho sira nia lingua materna, depois fasil ona atu estuda lingua seluk.
“Ha’u sempre apoia, tanba la’ós difisil atu komprende. Kestaun ida iha mundu ne’e, lian materna barak komesa lakon, iha Timor ida ka rua perigu estensaun, portantu ha’u apoia programa ne’e deside uluk kedas,” Prezidente Repúblika Jose Ramos Horta hatete ba jornalista sira hafoin remata abertura iha treinamentu ba sosializasaun kona ba edukasaun Multi lingua iha INFORDEPE, Kinta (18/04).
Xefe estadu espera ho Ministra Edukasaun nia lideransa, tenke iha formasaun di’ak liu ba profesór sira ne’e importante tebes, tanba profesór sira mak tau matan ba labarik sira.
Iha fatin hanesan, Ministériu Edukasaun (ME), Dulce de Jesus, hatete, pontu importante iha programa Edukasaun Multi Língua (EMuLi), ne’e mak oinsá transforma estudante sira atu hakat ba língua ofisiál tetum no portugés. Tanba estudante sira iha área rurais la hatene ko’alia tetum no portugés.
“Pontu importante mak bainhira tuir estudu iha mundu hatudu katak, labarik ida aprende bainhira nia la hatene lian ida ne’ebé nia aprende se karik nia iha lian inan, mak tenke hatuur fundasaun di’ak liu ba nia, liuliu literária no numerasaun antes nia hakat ba segundu ka terseira língua. Ho ida ne’e mak konsidera iha ita nia rai iha ita nia estudante barak mak liuliu iha área rurais balun sira la ko’alia tetum, la ko’alia Portugés ita ajuda liu husi literária ho numerasaun iha sira nia lian inan no depois halo progresaun hakat neineik tuir programa, tuir planu atu sira hakat ba tinan tuir mai ba iha língua ofisial sira. Ne’e mak ita iha programa EMuLi ne’e atu ajuda sira,”. hateten nian.
Governante ne’e hatete, rezultadu husi programa EMuLi ne’e iha prosesu di’ak tebes tanba estudante sira bainhira hakat ba klase normál nia dezempeñu di’ak.
“Rezultadu hatudu katak estudante sira ne’ebé hotu iha programa EMuLi ne’e bainhira hakat ba klase normál sira nia dezempeñu di’ak tebetebes, no mós estudante balun husi eskola EMuLi ba iha eskola Cafe sira nia dezempeñu di’ak tebe-tebes. Entaun evidénsia hatudu katak programa EMuLi ne’e iha progresu di’ak tebes,” dehan ministra.
Dauduk ne’e implementasaun programa EMULI halao ona iha munisípiu, Lautém, Manatutu no RAEOA Oé-cusse.
“Programa Edukasaun Multilanguage ka EMULI nu’udar programa importante ida iha Ministériu Edukasaun, ne’ebé implementa iha 2012 nu’udar pilotajen, uza métodu sira ne’ebá re koñesidu internasionalmente kona-ba hanorin lian dahuluk la ofisiál nu’udar instrumentu efetivu atu permite oportunidade ba susesu ba labarik sira ne’ebé la domina lian ofisiál ida bainhira tama ba sistema edukativu,” nia afirma.
4,218 total views, 24 views today
Bele hare Video Seluk :
Subscribe to Timorpost
