DILI (timorpost.com)—Sergio da Silva Soares Xavier hanesan Família Sobrevivente Masakre 17 Abríl 1999 iha rezidénsia Carrascalão, hakarak husu ba governu no estadu atu bele tau importánsia ba loron ida ne’e, hodi harii monumentu.
“Ha’u hanesan família no oan ba família sobrevivente Masakre 17 Abríl 1999 hakarak husu ba husu governu atu tau matan ba vítima ne’ebé sofre moras fíziku no mental no mós husu estadu Timor-Leste atu harii monumentu ida iha fatin refere atu nune’e jerasaun sira kontinua konta istória ne’ebé akontese iha loron 17 fulan Abríl tinan 1999, agora komemora ba tinan 25”.
Nia haktuir, ohin loron Masakre 17 Abríl 1999 tama ona ba tinan 25 maibé too ohin loron seidauk iha monumentu ida ba saudozu 12 ne’ebé lakon vida ba masakre ida ne’e, atu tau monumentu ida iha postu administrativu Maubara Munisípiu Likisá.
“Saudozu sira ne’e, primeiru maka Lito Carrascalão, Antonino da Silva Soares, Alberto, Raul Ramos, Joao no sira nain hira seluk tan ne’ebé mate iha rezidénsia Carrascalão nian”. Hakotu.
Masakre iha Rezidénsia Manuel Carrascalão akontese iha loron 17 Abríl 1999, semana rua liu tiha hafoin akontesimentu Masakre iha Igreja São João de Brito Liquiça iha loron 6 Abríl 1999.
921 total views, 9 views today
Bele hare Video Seluk :