DILI, (timorpost.com)—Kondisaun estrada liga kapitál munisipiu Lautém, husi Lospalos ba postu administrativu Iliomar, daudauk ne’e grave no ameasa povu nia vida, bainhira halo viajen ba mai.
Tuir observasaun Timor Post durante viajen husi Dili ba munisipiu Lautém, no kontinua ba postu administrativu Iliomar, komunidade barak sente triste ho kondisaun estrada, tanba estrada ligasaun kapitál Lospalos ba postu administrativu Iliomar, nakonu ho tahu no fatuk laran, nune’e bainhira udan tuun rai, estrada namdoras hodi amesa povu nia vida bainhira viajen ba mai.
Durante viajen komunidade Iliomar, Mozino Ximenes, ne’ebé tula oan no feen ho motorizada to’o iha fatin deskansa gruta Alapupul, informa, estrada ligasaun Lospalos ba iliomar ne’e grave loos ona, bele amesa ba sira-nia vida bainhira lakon kontrolu ba velosidade monu kedas.
“Ita-nia estrada ne’e tinan ba tinan ateru ba ateru halo ita isin kolen, ateru ho rai dodok hanesan ita bele monu, ita tenke halai ho kuidadu-an, ohin ne’e motorizada rua, tolu monu tanba rai namdoras”, Mozino Ximenes, informa ba Timor Post bainhira fila husi Iliomar mai Lospalos, Tersa, (02/01).
Tanba ne’e nia husu Governu da-9 presiza haree estrada ligasaun Lospalos villa ba postu Iliomar, bele hadi’a ona para bainhira udan monu rai labele fó risku dezastre ka asidente ruma hasoru komunidade Iliomar ne’ebé halo viajen ba mai.
Enkuantu iha fatin hanesan, Onorio Incarnação, husu ba Governu atu aprova proposta ba konstrusaun estrada ligasuan Lospalos villa ba postu administrativu Iliomar ho kilomentu kuaze 40, ne’ebé dezde okupasaun Indonézia mai ukun-an seidauk hadi’ak.
“Estrada ne’e kle’ur ona la hadi’ak, tanba ne’e ami husu ba Governu atu hadi’a, tanba tempu udan monu rai estrada nakonu ho bee no tau dodook, hodi fó risku ba vida pasajeiru sira ne’ebé halo viajen ba mai”, Onorio esplika.
Tuir nia haree, iha loron 23 Dezembru tinan kotuk (2023) karreta bís ida halai direisaun Dili ba Iliomar liu iha estrada refere atu monu tanba udan, tahu dodok karreta tama mout tiha. Tanba ne’e aproveita oportunidade ne’e, reprezenta komunidade husu ba Governu da-9 atu urjentemente haree estrada ligasaun Iliomar ba Lospalos, atu nune’e labele fó impaktu ba komunidade sira ne’ebé halo viajen ba mai Dili-Iliomar no Lospalos-Iliomar nian.
Nia haktuir, kompaña sira uluk ne’e ateru ho rai-mean ho fatuk entaun bainhira udan monu rai namdoras, fatuk boboot de’it mak latan iha estrada halo movimentu karreta ho motorizada tenke liuhosi fatin ne’e ho neineik.(*)
804 total views, 3 views today
Bele hare Video Seluk :
Subscribe to Timorpost
