DILI, (timorpost.com) – Parlamentu Nasionál (PN) liuhodi deputada, Carminha Carlota, husu ba Ministru Obras Públikas (MOP), Samuel Marçal, atu tau atensaun ba Institutu Jestaun Ekipamentu, Apoiu Dezenvolvimentu Infraestrutura Institutu Públiku (IJEADI.IP).
“Ha’u atu dehan de’it uluk ami halo aúdensia ho IJEADI, mákina pezadu kuaze 80 resin mak avariadu tiha hotu ona, nune’e ami atu husu de’it ba Ministru Obras Públiku atu tau atensaun ba IJE, tanba agora daudauk udan iha fatin hotu estrada att, dalan kotu”, Deputada, Carminha Carlota, hatete liuhosi nia intervensaun iha debate espesialidade ba Orsamentu Jerál Estadu (OJE) tinan fiskál 2024 iha PN.
Nia hatutan, ho orsamentu alokasaun ba IJEADI nian presiza hadi’a ekipamentu pezadu sira, nune’e bele koloka ba iha munisípiu sira atende situasaun emerjénsia, liuliu mota no estrada ne’ebé hetan estragu husi dezastre naturál.
Enkuantu, Deputadu Gabriel Soares, hatete “Udan boot foin lalais ne’e dalan barak kotu, hanesan Laklubar, Kairui iha ponte ki’ikoan ida kotu monta ne’e prezudika tebes ba komunidade sira, atu liu”.
Tanba ne’e, nia husu ba Governu atu tau atensaun ba situasaun grave sira ne’ebé povu infenta, liuliu koloka ekipamentu pezadu sira hodi halo atendimentu urjente hodi fasilita movimentasaun komunidade nian para buka moris.
Hatan ba preokupasaun hirak ne’e, Ministru, Samuel Maral, rekoñese situasaun ohin loron grave, tanba ne’e MOP haruka ona ekipamentu pezadu ba tereñu hodi halo normalizasaun emerjénsia.
Iha debate espesialidade ne’e, PN aprova ona OJE tinan fiskál 2024 nian ba IJEADI ho votus afavór 44, kontra 1 no abstensaun 19.
Orsamentu ba IJEADI iha dotasaun inisiál totál millaun $3.969.402 USD, fahe ba saláriu vensimentu hamutuk millaun $1.726.804 USD, bens servisu korrente hamutuk millaun $1.599.273 USD, kapitál dezenvolvimentu hamutuk rihun $ 643.325 USD, transferénsia públika no kapitál minór laiha.(*)
741 total views, 3 views today
Bele hare Video Seluk :