LIKISÁ (timorpost.com)—Grupu Kooperativa Kréditu Família Hadomi Futuru (K-KFHF), funda ho misaun ida atu redús pobreza iha família no hasa’e kresimentu ekonomia liu husi transformasaun komunitaria.
Xefe Kooperativa Kréditu Família Hadomi Futuru (K-KFHF), Nicolau Hornai dos Santos, hatete, harii grupu K-KFHK atu redús pobreza iha família no hasa’e kresimentu ekonómia uma laran nian.
“K-KFHF nia ezisténsia atu redús pobreza iha família no hasa’e kresimentu ekonomia uma laran nian”. Ni haktuir ba Timor Post iha fatin Kooperativa Debu-Dila, Likisá, Sábadu (16/09/2023).
Harii Grupu K-KFHF iha loron 07 Novembru tinan 2021, ho objetivu Rai Osan ba Mudansa (ROMANSA), entaun grupu ne’e ho naran Kooperativa Kreditu Família Hadomi Futuru (K-KFHF) signigika hadomi futuru hahú agora labele hein. Ho moto katak “Muda Ha’u Nia Moris Hahú Husi Dolar Ida”.
Portantu, Grupu K-KFHF iha estrutura no envolve membru hamutuk 29 kompostu hosi feto Sia (9) no mane 20.
Iha fatin hanesan, Fasilitadór Grupu K-KHFK, Jacinto Ulan Suni, esplika, foufoun harii Grupu ne’e ema na’in 15 de’it, nune’e koko la’o tinan ida resin membru komesa aumenta daudaun 29 ona.
“Entaun, primeiru siklu ami konsege rekolla dollar Amerikanu 6.054 USD, siklu ida ne’e ami konsege rekolla tan 6 mill ital ho osan funan 1.22,50, daudaun ne’e hela 12 mill ital rai iha brankas,” Nia hatete.
Rai osan iha tipu tolu hanesan, osan brankas ho montante dollar Amerikanu 10USD. Rai osan mínimu dollar amerikanu ida (1) USD. Tuir fali osan sosiál kada fulan membru ida rai dollar Amerikanu ida (1) USD.
Ulan haktuir, osan sosiál ne’e ho objetivu bainhira membru ida hetan susar ruma hanesan, partus, moras ne’e fó apoiu dollar Amerikanu 10 USD tuir kapasidade grupu nian.
Fasilitadór hatete, objetivu prinsipál mak oinsá rai osan, laiha interese atu hetan osan funan boot, maibé rai de’it osan karik tinan sei iha mudansa.
Xefe Suku Lauhata, Daniel dos Santos, parabéniza grupu K-KHFK durante halibur ferik no katuas sira oinsá hatene rai osan hodi muda moris iha futuru.
“Onra boot ida mai ha’u bele hamutuk ho kooperativa Kréditu Família Hadomi Futuru, apresia tebes hakarak valoriza imi tanba imi hahú ho hanoin di’ak oinsá hatene rai osan,” Daniel do Santos dehan.
Autoridade lokál ne’e enkoraja, kooperativa ne’e di’ak liu hanorin ema atu rai osan, entaun labele rai iha uma agora tanba ema barak matenek hodi buka tuir osan para uza nesesidade seluk.
1,346 total views, 33 views today
