Jornalista: Jaime Pires / Noémio Falcão
DILI (Timor Post) – Polísia Repúblika Indonézia (POLRI) liuhosi Kapolres Belu kaptura timoroan na’in-113 nu’udar membru ba organizasaun arte marsiál Persaudaran Setia Hati Terate (PSHT) iha area Haliulun no Fatubenao, Atambua, Nusa Tengara Timur (NTT).
Kapturasaun ne’e iha loron Segunda (09/08/2021) maizumenus tuku 09:00 oras Indonézia nian.
Membru hirak ne’e kompostu hosi mane na’in-105, feto na’in-8, autoridade seguransa Indonézia kaptura bainhira tama ilegalmemte ba Indonézia ho objetivu atu ba sa’e sintu.
Dadaun ne’e sidadaun Timoroan hirak ne’e asegura ona iha Malpores Belu hamutuk ho sasan evdénsia sira mak hanesan manu ne’ebé mak sira lori.
Nune’e mós hodi kalan tuku 11, PNTL liuhusi UPF kaptura tan membru GAM na’in haat sidadaun timoroan ne’ebé mak hakat ilegal fronteira hodi ba Indonézia.
Komandante UPF, Superintendente Euclides Belo, deklara sidadaun hirak ne’e UPF kaptura liuhusi operasaun ne’ebé halo iha liña mean fronteira terrestre Timor-Leste ho Indonézia.
“Horikalan iha oras tuku 11, ita nia membru sira hosi UPF Kompañia Alfa Postu Tunubibi kaer joven nain 4 iha area mota laran ne’ebé tenta ultrapasa fronteira ilegalmente ba Indonézia”, informa Euclides Belo, iha Kuartel UPF, Nu Badak, tersa ne’e.
Nia aumenta, ema nain haat agora daudaun ne’e membru UPF sei halo identifikasaun hafoin entrega ba Komandu Munisípiu Bobonaru halo investigasaun no sei entrega ba ekipa saúde COVID-19.
Euclides deklara, kona-ba asuntu fronteira nia parte nafatin esforsu servisu hamutuk ho BOP no COE hodi asegura situasaun hakmatek iha liña fronteira.
“Ami simu orientasaun husi Komandu Jerál PNTL hodi halo alerta no halo prevensaun masimu hodi garante liña fronteira sai fatin seguru ba ema hotu liu-liu iha iha Maliana, Suai to’o Oe-Cusse”, nia hatutan.
Euclides nafatin husu ba sidadaun hotu-hotu ne’ebé hela iha fronteira atu halo kooperasaun diak ho PNTL kontribui ba seguransa publika.
Enkuantu antes ne’e Polisia Nasional Timor-Leste, liu hosi Unidade Bataliaun Ordem Publiku (BOP) hamutuk ho Compaina Operasaun Espesial (COE) halo mos kapturasaun ba membru GAM hamutuk sanulu resin mak tenta tama ilegalmente ba Atambua, Indonézia liu hosi fronteira trestre.
816 total views, 3 views today
Bele hare Video Seluk :
Subscribe to Timorpost
