DILI, (timorpost.com)— Nasaun amigu Kuba liuhosi Embaixadora Kuba iha Timor-Leste, Grisel Alina Aldama Innis, komprometidu kontinua hametin relasaun bilaterál nune’e apoiu nafatin Timor-Leste (TL), iha área saúde no edukasaun.
Deklarasaun ne’e Vise-Primeiru Ministru no Ministru Kordenadór Assuntu Sosiál, Ministru Dezenvolvimentu Rurál no Habitasaun Komunitária, Mariano Assanami Sabino, hato’o hafoin hala’o enkontru ho Embaixadora Kuba iha Timor-Leste, Grisel Alina Aldama Innis, iha Palásiu Governu, Tersa, (06/02).
“Embaixadora Kuba iha Timor-Leste, Grisel Alina Aldama Innis, sente orgullu bele hala’o enkontru ho ita hodi partilla informasaun relasiona ho akordu ne’ebé Kuba halo ona ho Timor-Leste”, Assanami informa.
Iha sorin seluk, Embaixadora Kuba iha Timor-Leste, Grisel Alina Aldama Innis, sente kontente bele hasoru malu ho Vise-Primeiru Ministru, hodi informa liután servisu kooperasaun sira ne’ebé mak nasaun rua halo ona durante ne’e no kontinua ba oin nafatin.
“Partikularmente ohin informasaun ba Vise-Primeiru Ministru, relasiona ho kolaboradores médiku no kolaboraderes desportivas ne’ebé durante ne’e fó asisténsia ba Timor-Leste, liuhosi Universidade Nasionál Timor Lorosa’e (UNTL),” hatete Embaixadora Kuba iha Timor-Leste, Grisel Alina Aldama Innis, iha Palásiu Governu ohin.
Nia subliña, Kuba hanesan nasaun amigu ba oin hakarak kontinua nafatin apoiu Timor-Leste iha área saúde no edukasaun durante tinan 2024 ne’e.
Daudauk ne’e kolaboradores Kubanu sira mós hala’o hela servisu saúde komunitária iha munisípiu hotu-hotu, hanesan médiku sira akompaña estudante sira iha área siénsia nian.(*)
2,736 total views, 9 views today
Bele hare Video Seluk :
Subscribe to Timorpost
