DILI (timorpost.com) – Komunidade aldeia haat husi suku Dare, postu administrativu Vera Krús, munisípiu Dili, durante tinan barak nia laran to’o ohin loron seidauk asesu ba bee moos.
Xefe suku Dare, Gil de Araújo, hatete, suku Dare iha aldeia hamutuk 10, maibé komunidade iha aldeia neen asesu ona ba bee moos, eletrisidade no estrada kuaze porsentu 80 ona.
“Maibé iha aldeia haat mak ami nia komunidade la asesu ba bee moos kuaze tempu iha Indonézia mai to’o ukun rasik-an tinan 21 ona komunidade iha aldeia Lemorana, Kola 1, Kola 2 no Kolelaus, seidauk asesu ba bee moos hodi konsumu ba nesesidade loron-loron nian,” Gil haktuir ba Timor Post iha Matadouru, Domingu (30/07).
Lider komunitariu ne’e esplika, komunidade aldeia haat ne’e la’o ain ho distánsia dook hodi ba kuru bee moos iha mota laran nune’e bele utiliza ba nesesidade loron-loron nian.
Nia dehan, tuir loloos Dili ne’e kapitál nasaun entaun povu la merese atu halerik ba bee moos no eletrisidade, maibé situasaun ne’e sempre akontese iha Dili laran no halo povu sempre halerik ba bee moos.
“Tanba ne’e mak ami husu ba nonu governu bele tau mós prioridade ba problema infraestrutura liuliu bee moos, eletrisidade no estrada atu nune’e povu hotu bele asesu ho di’ak no povu bele sente duni sira nia votu ne’e iha valor,” nia hateten.
Tanba Timor ukun-an tinan 21 ona, maibé realidade problema setór infraestrutura ne’e susar atu rezolve no populasaun sempre hakilar ba bei-beik, tanba ne’e mak husu ba nonu governu bele rezolve ona preokupasaun hirak ne’e, nune’e povu bele sente duni benefísiu husi ukun rasik-an ida ne’e.
Tuir nia, atu povu labele kestiona kona ba problema hirak ne’e, entaun Governu tenke rezolve problema sira ne’e, tanba povu hakarak nia votu tinan lima ne’e tenke folin mak hadi’a povu nia moris husi mukit ba moris di’ak.
Tanba ne’e, governu liuhusi BTL,EP presiza instala bee moos ba komunidade hodi bele asesu ho di’ak nune’e bele responde ba nesesidade urjente, tanba bee moos sai fatór importante tebes ba ema atu uza te’in, hahán, hariis no fase roupa.
Portantu, suku Dare iha aldeia hamutuk 10 hanesan aldeia Vila bemate, Kola 1, Kola 2, Balelaus, Kasnafar, Morana, Nahaek, Fatunaba no Kolelaus ho ninia populasaun hamutuk 4.128.
1,077 total views, 3 views today
Bele hare Video Seluk :
Subscribe to Timorpost
