Ataúru (timorpost.com) – Xefe Suku Beloi, Munisípiu Ataúru, Adão da Costa Nunes, hatete populasaun iha suku ne’e maioria moris nu’udar agrikultór espesífiku liu ba área Peska.
“Iha ne’e ita liga ba área Peska ninia produtu lokál, hanesan inan-aman sira ne’ebé haree liubá budu-tasi no ikan, feto ne’e kontinua kesi budu no mane ne’e bele hetan osan husi fan ikan,” hateten Adão, ba Timor Post ne’ebé partisipa mós iha atividade kuda ai-mangrove iha Suku Beloi, Kinta (24/11)
Nia dehan, produtu lokál seluk mak hanesan artezanatu liuliu produs kadeli, kelu, brinku, no seluk tan husi lenuk kulit no ai-tasi nian.
“Modelu seluk mak sira mós promove hela Sana-rai ho Ekipamentu Manual de’it, ita espera sira bele hetan mákina ne’ebé modernu uitoan nune’e bele hasai kuantidade no kualidade sana-rai ne’e rasik,” dehan nia.
Antes ne’e Negosiante ikan no katupa, Eugenia Soares, hatete liuhusi Negósiu ne’e mak sustenta nesesidade loroloron.
“Ami-nia moris mak fan ikan no katupa iha Portu Dili oin, se ita moris iha tasi ibun mak la halo buat sira ne’e ita atu han saida,” hateten Negosiante ne’e.
Nia hatutan, durante Festival iha Ataúru ne’e sira-nia produtu lokál ne’ebé folin, no hetan lukru iha semana ida kuaze 500 USD.
“Loron baibain ne’e hetan mak 50 dolar de’it, no mós boot ona, maibé semana ida ne’e ema barak dala-ruma mós katupa no ikan lalar mós la too tan,” haktuir negosiante ne’e.
Nia dehan, husi hahán ne’ebé sira fan ne’e maioria ho folin ne’ebé baratu, hanesan katupa fuan ida 1 USD, ikan ida folin 1 USD, balun dolar rua to’o tolu maibé depende kuantidade ikan.
Nia informa, sira fan tuir oráriu normal Ro nian, semana ida dala-tolu, hanesan loron Tersa, kuarta no sábadu. No loron seluk ne’e fan mós ema sei la sosa.
1,462 total views, 9 views today
