DILI (TimorPost.com)—Konsellu Ministru Ohin (12/7), aprova ona programa IX governu konstituisional molok aprezenta ba iha Parlamentu Nasional hodi debate no aprova.
Iha reuniaun ne’ebé halao iha Palacio do Governu, Ministru Prezidensial Konsellu Ministru Agio Pereira, hatete, Programa Governu Konstitusionál IX. Programa ne’e sintetiza polítikas públikas prinsipáis ne’ebé atu adota durante Governu ninia mandatu.
“Objetivu mak atu hametin no otimiza setóres governasaun nian no sira nia rekursu, hodi habadak dalan atu transforma vizaun Ajenda Dezenvolvimentu Sustentavel 2030 nian no Planu Estratéjiku Dezenvolvimentu 2011 – 2030 nian hodi sai realidade,” dehan portavo governu ne’e ba jornalisra sira.
Nia hatete, iha reuniaun ne’e Konsellu Ministrus delibera ona mós aprezenta ba Parlamentu Nasionál Votu Konfiansa ida ba Governu, ne’ebé fundamenta husi kompromisu ne’ebé firme no determinadu Governu atu implementa ninia Programa, ho objetivu atu promove dezenvolvimentu, prosperidade no moris diak ba sidadauns timoroan.
Programa ne’e kompoin husi área prinsipál neen, hanesan afirma filafali Estadu Direitu Demokrátiku, dezenvolvimentu kapitál sosiál, dezenvolvimentu infraestruturas, dezenvolvimentu ekonomia, konsolidasaun governativa no boa governasaun, no kombate hasoru korrupsaun.
Depois reuniaun KM IX governu kontinua kedas aprezenta ba parlamentu nasional, hodi debate programa governu.
1,845 total views, 6 views today
Bele hare Video Seluk :