Dili (timorpost.com) – Komandu Jerál Polísia Nasionál Timor-Leste (PNTL), Sesta (19/05/2023), koloka ona membru sira ba munisípiu hodi bele asegura komemorasaun loron restaurasaun independénsia no festa demokrasia ne’ebé sei realiza iha loron 20 no 21 Maiu.
Komandante Jerál PNTL, Henrique da Costa, hatete membru sira ne’ebé apoiu munisípiu 14, ne’e kompostu hosi komandu jerál rasik, unidade espesiál polisia (UEP), unidade patrulhamento fronteira (UPF), no unidade polisia marítima (UPM).
“Sira ne’e ita koloka ba munisípiu hodi asegura eleisaun, karik akontese situasaun ruma bele halo atuasaun,” nia hateten hafoin koloka membru sira destaka ba munisípiu iha Kuartél Jerál PNTL, Kaikoli.
Nia dehan, membru sira ne’ebé destaka ba asegura eleisaun parlamentár ne’e to’o kontajen remata akompaña fali mai Dili.
“Hakarak ka lakohi ita-nia nasaun tenke garante eleisaun la’o ho di’ak,” nia hateten.
Nia hatutan, esperiensia hatudu ona, kampaña durante ne’e la’o ho hakmatek.
Maibé, nia dehan buat hirak ne’e la’ós tanba polisia servisu mesak, ne’e hetan kontribuisaun hosi komunidade sira no sira rasik hatene ona hadok an hosi violénsia.
“Ita nafatin ezije ema hotu atu bele kontribui ba pás no estabilidade, atu nune’e buat hotu bele la’o di’ak hosi eleisaun to’o forma governu,” nia afirma.
Tanba ema hotu iha mundu mós tau matan hela mai Timor-Leste, katak oinsá demokrasia iha ne’e la’o di’ak ka lae, iha duni liberdade ba ema hotu atu ezerse sira-nia direitu ka lae, ne’e duni presiza tebes kontribuisaun parte hotu nian.
Portantu, kbiit komandu jerál nian mak koloka ona membru 200 ho ekipamentu ne’ebé iha ona atu bele halo seguransa ba festa demokrasia ne’e iha territóriu nasionál bele la’o ho di’ak no susesu.
1,638 total views, 3 views today
Bele hare Video Seluk :
Subscribe to Timorpost
