DILI (timorpost.com) – Servisu Jestaun Kontrolu Merkadu Munisípiu Dili (SJKMMD) hamutuk ho negosiante sira halo limpeza iha merkadu Taibesi no Manleuana hodi hamoos fo’er sira iha merkadu laran no hadi’a barrajen ne’ebé aat ona.
“Ha’u orienta membru Servisu Jestaun Merkadu no seguransa iha merkadu Manleuana no merkadu Taibesi hamutuk ho negosiante no polisia postu Na’in Feto halo limpeza hamoos fo’er no hadi’a baleta kuak atu nune’e tempu udan labele mosu inundasaun hanesan tinan hirak ba kotuk,” Xefe Departamentu Jestaun Merkadu Munisípiu Dili, Gaspar da Silva, hateten ba Timor Post iha merkadu Taibesi, Sesta (12/05).
Xefe departamentu ne’e hatete, objetivu husi limpeza ne’e fó hanoin mós ba negosiante sira atu soe fo’er iha lixu fatin ne’ebé estadu estabelese ona hodi redús lixu iha merkadu rua refere, nune’e negosiante sira bele hadook-an husi moras oi-oin.
Nia dehan, atividade limpeza ne’e hala’o iha loron Sesta ho Sábadu, ne’e sempre orienta membru servisu jestaun merkadu ho negosiante sira sempre halo limpeza jerál hotu mak foin kontinua atividade servisu nian hanesan bai-bain.
Nia dehan, dala barak mak públiku kestiona merkadu Taibesi nakonu ho fo’er kada loron, tanba negosiante sira ne’e ladún iha konxiénsia soe fo’er iha lixu fatin, entaun pesoál saneamentu munisípiu Dili susar atu kontrolu ho másimu iha terenu.
“Tanba ne’e mak ami halo limpeza hamutuk ho negosiante sira hodi fó hanoin ba sira produs fo’er tenke tau iha fatin lixu, atu nune’e pesoál saneamentu kontrolu iha terenu bele ra’ut tau iha lixu fatin hodi lori ba tau iha Tibar,” nia hatutan.
Tuir nia, husi limpeza kada semana-semana ne’e bele redús lixu iha merkadu rua refere, entaun merkadu sira ne’e bele limpu iha ema hotu nia matan.
Iha fatin hanesan, negosiante merkadu Taibesi, Luzia Maria Lourdes, hatete, negosiante sira hamutuk ho funsionáriu servisu jestaun merkadu no polisia postu Na’in Feto halo limpeza jerál iha merkadu hodi nune’e merkadu iha ambiente ne’ebé moos.
“Tanba ne’e mak ami limpeza hamutuk ho funsionáriu sira hodi bele redús lixu iha merkadu laran no mós bele hadook-an husi moras oi-oin ne’ebé akontese iha futuru”, nia hateten.
Enkuantu, tuir observasaun jornalista Timor Post iha terenu nota katak, iha tuku 09:30 OTL dadeer, funsionáriu servisu jestaun no jestór merkadu ho negosiante sira hahú halo limpeza jerál hanesan dasa rai no hamoos baleta kuak.
1,737 total views, 3 views today
Bele hare Video Seluk :
Subscribe to Timorpost
