DILI (timorpost.com) – Iha fulan Abríl tinan 2023, Diresaun Nasionál Transporte Terestre (DNTT) rekolla taxa ho montante osan hamutuk 6.620.00 USD hodi hatama ba kofre Estadu.
“Iha fulan ne’e ami rekolla taxa husi transporte públiku kompostu husi angguna, taxi, mikrolete no bis halo movimentasaun iha terenu ne’ebé komete erru hanesan dokumentu karreta la kompletu, xapa matríkula, STNK mate entaun tenke selu multa ho osan 100 USD,” xefe seksaun transporte públiku DNTT, Bernardo Vicente Fernandes Soares, hateten ba Timor Post iha nian servisu fatin Balidi, Kinta (11/05).
Nia dehan, taxa ka reseita ne’ebé sira rekolla husi transporte públiku hirak ne’e hamata ba kofre estadu hodi kontribui ba dezenvolvimentu iha rai laran hodi nune’e labele dependente liubá fundu mina rai. Tanba ne’e maka husi reseita hirak ne’e bele tulun estadu atu bele kontribui ba dezenvolvimentu iha rai laran liuliu setór ekonomia.
Portantu, durante ne’e sira nia ekipa tun iha terenu hodi halo inspesaun ba transporte públiku ne’ebé sirkula iha terenu karik transporte públiku ne’ebé kontra regra sira sei fó sansaun ho osan ka multa atu nune’e ba oin labele komete.
Xefe seksaun transporte públiku ne’e tuir, transporte bis ne’ebé halai husi Dili ba Baukau selu tarefa 4 USD no Dili ba Lautem selu tarefa 8 USD no Dili ba Vikeke 8 USD no Dili-Kovalima 15 USD no Dili-Aileu 20 USD.
Entretantu, Dili-Likisá selu tarefa USD, Dili-Bobonaru 8 USD, Dili-Ainaru selu tarefa 8 USD no Dili-Manufahi 10 USD ne’e tuir regra normal DNTT nian karik motorista sira kontra maka pasajeiru ba hato’o iha DNTT maka sei foti medida hasoru tenke selu multa ka bele dada fila xapa matríkula karreta no STNK karreta nian. Atu nune’e iha futuru motorista sira labele komete liuliu iha loron finadu, natal no Páskua sira labele hasae tarefa tuir sira nia hakarak.
“Ami la tolera transporte públiku ne’ebé kondisaun at ka grave no dokumentu la kompletu sirkula iha terenu ami sei foti medida rigorozu maka tenke prende ka selu multa atu nune’e ba futuru labele akontese,” nia promete.
Tanba ne’e, nia husu ba transporte públiku ne’ebé halo sirkula iha Dili laran no ba iha munisípiu tenke kondisaun diak no kompleta ho dokumentu karreta nian atu nune’e bele asegura iha situasaun ne’ebé de’it labele akontese buat ruma ema hotu la espera.
882 total views, 3 views today
