DILI—Prezidente Konsellu Administrasaun Rádiu Televizaun Timor Leste, Empreja Públiku (RTTL.ep) Francisco da Silva Gary rejeita total nia funsionáriu mak sai vítima ba violasaun seksuál.
Francisco preokupa tebes ho públikasaun online Timor Post edisaun Kuarta (11/03/2020) ne’ebé temi katak vítima ba kazu violasaun seksuál ne’ebé polísia halo ona kapturasaun ba suspeitu, servisu iha RTTL.ep.
“Ami hatene katak, ami nia funsionáriu sira ne’ebé servisu iha ne’e, ami cek hotu laiha funsionáriu ida mak involve iha kazu ne’e. Ligadu ba parseiru sira ami seidauk hatene, ami seidauk iha dadus ida, mas ami hatene katak nia (vítima) la’ós funsionáriu husi Rádiu Televizaun Timor Leste nian,” Francisco hatete ba Jornalista Online Timor Post, iha nia servisu fatin, Kuarta (11/03/2020).
Nia dehan, bainhira temi vítima ne’e servisu iha RTTL hatudu katak nia funsionáriu iha instituisaun ne’e. Tanba ne’e, líder másimu ba instituisaun média públiku ne’e rejeita total online Timor Post temi RTTL.ep nia naran liga ho vítima ba kazu violasaun seksuál ne’e.
Entretantu Komandu Polísia Munisípiu Dili kaptura tiha ona suspeitu ida ho inisiál APD ne’ebé servisu hanesan funsionáriu iha Ministériu Turizmu Komérsiu no Indústria (MTCI) tanba deskonfia tula feto ida ho inisiál MDSG ho motor xapa matríku governu (G) ba halo violasaun seksual iha Ailaran ida iha area Marabia Suku Lahane Osidentál, Postu Administrativu Nain Feto, Munisípiu Dili.
Tuir kronolojia, iha loron Tersa (10/03), maizumenus tuku 11 meiudia, suspeitu konvida vítima atu ba haan meudia iha restaurante sira iha Dili laran, maibé bainhira ba tula tiha vítima, suspeitu lori motor ba fali iha ailaran.
To’o iha ailaran besik mota laran ne’e, suspeitu ameasa vítima no ikus mai vítima ko’alia mamar ba suspeitu tanba tauk hodi entrega nia an ba suspeitu.
Hotu tiha, suspeitu tula hikas vítima tun ba Dili hatún iha vítima nia servisu fatin. Maibé vítima foti desizaun ba halo keixa iha polísia hodi ba halo kapturasaun ba suspeitu.
“Ami rua hanesan kolega ne’e mak nia telefone ha’u iha servisu fatin no nia mai tula atu ba haan, liu tiha minutu balun nia too iha servisu fatin ho motor inklui helem rua nune’e tula atu hodi sai ba haan, maibé derepente de’it musu fali buat seluk,” vítima haktuir ba Jornalista sira iha komandu munisípiu Dili, iha Kaikoli, Kuarta (11/03/2020).
Nia haktuir, suspeitu lori nia ba rai fuik besik mota laran suspeitu hadau tiha nia telefone hafoin rakut malu no suspeitu ameasa ba vítima katak o hakarak mate ka moris ka o hakarak soe o ba rai naruk .
“Ami rua rakut malu kuaze minutu 5 nia laran no nia mós ameasa ha’u atu oho maibé la konsege tanba ha’u rasik mak hamaus nia katak o labele oho ha’u sé o atu halo saida ba ha’u halo de’it ha’u nia isin tomak hela ba. Nune’e nia mós dada sae ha’u hodi halo relasaun seksual,” vítima haktuir ho tanis.
Kazu ne’e rasik rezista ho númeru NUK NUK 0068/20/DIDIL. No dadaun ne’e vitima PNTL Munisípiu Dili, asegura ona iha fatin hakmatek Unidade Pesoas Vulneravél (UPV) Kaikoli Dili hodi bolu família vítima hodi fó deklarasaun no hodi hein prosesa kazu ne’e ba Ministériu Públiku.
Entertantu tuir obserbasa Timor Post iha tereinu nota, suspeitu detein hela iha sela Polísia Munisípiu Dili durante oras 72 molok supmbate ba interogatóriu dahuluk iha Tribunál Distritrál Dili. (cao)
996 total views, 3 views today
Bele hare Video Seluk :