DILI (Timor Post) — Governu Timor-Leste liuhusi Ministériu finansas nia Diresaun Jerál Estatístika Sekretariadu Sensus Populasaun no Uma kain 2022, halo abertura hodi realiza treinamentu ba Treinadór sira.
Diretór Jerál Estatístika, Elias do Santos Pereira, hatete treinamentu ohin ne’e importante tebes ba treinadór sira, no ohin hahú ona treinu.
“Sensus ne’e atu susesu depende ba ita boot sira, tanba ne’e maka ha’u hanoin ema sira ne’ebé treinu ne’e sira prepara ona”, nia hateten iha Institute of Business (IOB), Manleuana, Tersa (16/08).
Tanba ne’e, nia dehan, iha loron 04 Fulan Setembru tinan ida ne’e sensu populasaun hahú ona.
“Objetivu Sensu Populasaun no Uma-kain 2022, atu koleta informasaun ou dadus detalladu relasiona ho demográfiku populasaun ho ninia karakterístika sosiál no ekonómiku iha Nivel Administrativu hosi Nasionál, Munisípiu, Postu Administrativu, Suku, no Aldeia”, nia informa.
Nia informa tan, dadus hirak ne’e, importante ba Governante sira, Negosiante, Ajénsia Internasionál, peskizadór, Sosiedade Sivíl no sei sai hanesan mata-dalan ba Padraun konstrusaun dezenvolvimentu Nasaun ida ne’e ba futuru.
Nia haktuir, Timor-Leste hala’o ona Sensu Populasaun no Uma-kain ba dala-tolu depois de Restaurasaun Independénsia 20 de Maiu 2002. Primeiru Sensu hala’o iha Tinan 2004, Sensu daruak hala’o iha 2010 no Sensu dala-tolu hala’o iha 2015.
“Polítika Governu sei implementa Sensu Populasaun no Uma-kain ba tinan lima-lima, maibé Konsellu Ministru aprova ona katak, Sensu Populasaun no Uma-kain sei hala’o fali depois tinan sanulu, aliña mós ho rekomendasaun Nasoins Unidas nian”, nia hateten.
Nia hatutan, Sensu Populasaun no Uma-kain ne’ebé hala’o kada tinan lima-lima ida ne’e sei sai ba ikus nian iha 2022. Sensu tuir fali mai sei hala’o fila fali iha tinan 2023.
Ikus nia aprezenta, Ministériu Finansas no Sekretaria ho nia ekipa apoiu ona fó servisu ba maluk treinadór ba Sensu Populasaun no Uma kain iha rai laran hamutuk 3.424.
1,846 total views, 3 views today
