BAUKAU (timorpost.com)–Ekipa Kestaun Dezastre Naturais (EJDN) Munisípiu Baukau partisipa formasaun responde dezastre natural ne’ebé realiza husi Cruz Vermella Timor-Leste/liu husi Departamentu Responde Emerjénsia, tersa (21/11) iha CVTL Filial Baukau.
Jestor Departamentu Responde Emerjénsia CVTL Nasionál, Filomeno de Araújo hatete, formasaun ne’e nia objetivu atu kanaliza informasaun ba membru dezastre naturais iha territóriu nasionál atu iha koñesimentu natoon hodi apoiu emerjénsia ba komunidade ne’ebé sai vítima ba dezastre naturais bainhira akontese.
Nia esplika matéria ne’ebé fasilita ba partisipante sira mak hanesan koordenasaun planu operasionál, levantamentu dadus vítima afetadu, manejamentu jestaun kampu avaliasaun, prosesu ajuda umanitáriu ba vítima, nune’e mos vítima ne’ebé lakon iha akontesimentu dezastre no halo protesaun jéneru no inkluzaun vítima sira.
“Formasaun ne’e rasik ho objetivu atu kanaliza informasaun ba ita nia membru jestaun dezastre sira iha territóriu tomak nune’e bele iha koñesimentu karik dezastre ruma akontese ema hotu prontu ona bele fó apoiu emerjénsia ba ita nia populasaun sira,” dehan Filomeno iha CVTL Filial Baukau.
Iha Fatin hanesan reprezentante Prezidente Autoridade Munisípiu Baukau, Nelson Nunes konsidera formasaun ne’e importante tebes ba membru Konsellu Munisipál jestaun dezastre tanba hetan koñesimentu hodi hala’o serbisu iha terenu.
Entretantu Pontu Vokál dezastre naturais husi Postu Administrativu Laga, Joaninha Magno de Almeida kontente partisipa iha formasaun tanba bele hetan esperiénsia hodi implementa iha baze atu responde ba vítima dezastre natural ne’ebé kada tinan sempre akontese iha postu Laga.
Formasaun durante loron 4 ne’e fasilita husi formadór husi CVTL Nasional, Diresaun Nasionál Seguransa Patrimóniu Públiku (DNSPP), Diresaun Nasionál Prevensaun Konflitu Komunitáriu (DNPKK), Ambiente/ Bombeiru no instituisaun relevante ne’ebé halo intervensaun ba asuntu dezastre naturais.(#)
3,458 total views, 3 views today
Bele hare Video Seluk :
Subscribe to Timorpost
