DILI (timorpost.com)-Ministériu Finansas (MF) liuhusi ninia koordenadór Gabinete Jurídiku iha Kinta (04/05) fahe informasaun ba funsionáriu Sekretáriu Estadu Juventude no Desportu (SEJD) nian, kona-ba regra ezekusaun Orsamentu Jerál Estadu (OJE) 2023.
Oradór ba programa diseminasaun ne’e mak koordenador Gabinete apoiu Jurídiku Ministériu Finansas nian, Izac Menezes, enkuantu partisipante sira kompostu husi Diretór Jerál, Xefe Gabinete, Diretór Nasionál, Xefe Unidade, no Xefe Departamentu sira SEJD nian.
“Regra ezekusaun ne’e bazeia ba Dekretu-Lei No.1/2023, 25 Janeiru, kona-ba Ezekusaun Orsamentu Jerál Estadu (OJE) 2023 no mós kontratu públiku sira” afirma Izac Menezes.
Iha oportunidade ne’e, Diretór Jerál Juventude no Desportu, David Tomas de Deus konsidera, workshop ida ne’e importante tebes hodi hetan esplikasaun klaru husi parte jurídiku nian, kona-ba regras ezekusaun orsamentu.
Nia konsidera, ho formasaun refere bele tulun SEJD ezekuta orsamentu tuir regras ne’ebé estabelese ona iha Dekretu Lei Governu nian.
Nune’e nia hanoin, funsionáriu no ajente estadu nian hotu, husi nivel Sekretáriu Estadu, Diretór Jeral to’o funsionáriu sira, presiza hatene prosedimentu sira kona-ba ezekusaun finanseiru nian.
Iha fatin hanesan, Inspetor Jeral, João dos Santos haktuir katak, workshop ida ne’e etapa daruak, tanba etapa dahuluk realiza ona iha semana hirak liu ba. Workshop ida ne’e mós hala’o ba funsionariu no kargu xefia sira, atu sira bele komprendeka intende diak liu kona-ba ezekusaun orsamentu, liu-liu iha tinan 2023 ne’e.
Entretantu Xefe Unidade Komunikasaun no Relasaun Publika, Beldemira de Araujo haree katak partisipante sira sente interesadu.
Durante workshop, partisipante sira rona ho atensaun maka’as no ativamente husu klarifikasaun ba asuntu sira ne’ebé sira hakarak hatene kle’an liu. Ida ne’e pozitivu tebes hodi ajuda ezekusaun orsamentu tuir regras ne’ebé estabelese ona iha Dekretu Lei Governu nian. (PJ5)
1,276 total views, 6 views today
Bele hare Video Seluk :