DILI—Prezidente Repúblika (PR), Francisco Guterres Lú Olo, kontinua husu partidu CNRT ho nia aliadu foun sira atu tetu didi’ak membru sira ne’ebé nia la fó pose iha governu daualu bainhira hakarak aprejenta fila-fali sira nia naran iha governasaun tuir mai.
“Ema hotu hatene ona katak Prezidente Repúblika horibainhira la fó pose. Ikus mai, tanba de’it dehan katak ema na’in-sia, vota kontra Orsamentu Jerál Estadu (OJE) 2020, orsamentu ida ba povu tomak, halo Governu no Primeiru-Ministru, Taur Matan Ruak hanesan ne’e hela,” Lú Olo hatete ba Jornalista sira hafoin halo abertura ba Konferénsia Nasionál Komisaun Anti Korrupsaun (KAK), iha salaun Ministériu Finansa, Aitarak Laran, Dili, Segunda (24/02/2020).
Tanba ne’e, Lú Olo afirma, CNRT ho nia aliadu foun atu aprezenta filafali lista ema na’in-sia niniantenke tetu didi’ak.
“CNRT ka partidu sira-ne’e, hanoin halo didi’ak! Hanoin halo didi’ak! Ha’u repete tan, hanoin halo didi’ak maka aprezenta!,” Lú Olo afirma.
Maske nune’e, antes ne’e, Lú Olo deklara, sei fó apoiu ba kualkér koligasaun foun atu forma Governu foun hodi ultrapasa impase polítika rai-laran.
“Ha’u hanoin importante maka partidu polítiku sira buka malu ba, depois maka bele fó hatene ba Prezidente Repúblika, kona-ba Governu ida ne’ebé maka sente ba di’ak atu bele lori ita-nia rai ne’e bá-oin. Prontu, Prezidente Repúblika sempre fó apoiu nafatin, atu ita bele ultrapasa krize ida-ne’e, atu bele hadi’a fali ita-nia Governu. Ita hakarak iha governasaun ida-ne’ebé sustentável durante tinan rua ka tolu nia laran, hodi iha fali orsamentu, iha fali programa atubele hala’o dezenvolvimentu”, Lú Olo subliña.
Entretantu membru governu indijitadu ne’ebé Xefe Estadu la fó pose iha governu daualu mak hanesan Ministru Finansa, Helder Lopez, Ministru Turizmu, Komérsiu no Indústria, Francisco Kalbuadi Lay, Minstru Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór (deklara rezigna-aan ona), António Verdial, Vise-Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.
Enkuantu, Ministru Planeamentu no Investimentu Estratéjiku, Samuel Marçal ho Ministru Petróleu no Rekursu Minerál, Alfredo Pires, prezidente repúblika aseita fó pose, maibé kandidatu na’in-rua ne’e lakohi tanba hakarak fó solidariedade ba kandidatu membru governu nain-hitu seluk.
Entretantu bazeia ba orientasaun prezidente repúblika nian ba partidu sira asentu parlamentar halo movimentasaun polítika hodi hetan konsertasaun ba formasaun governu foun, líder máximu husi partidu neen inklui CNRT, PD, KHUNTO, UDT, FM no PUDD asina ona akta koligasaun iha Sede Nasionál Partidu CNRT, Bairro dos Grilhos, Dili, iha loron Sábadu (22/02/2020).
Prezidente CNRT, Kayrala Xanana Gusmão hatete, partidu neen ne’e hatudu iha ona forma ba formasaun governu foun hodi nune’e bele hakotu impase polítika atuál.
Kondena Impedimentu sira hasoru Governu Dasia
Iha parte seluk, Sekretáriu Jerál Partidu Demokrátiku (PD) António da Conceição kondena impedimentu sira hasoru governu dasia ne’ebé involve forsa polítiku sira husi partidu neen inklui CNRT, PD, KHUNTO, UDT, FM no PUDD.
António hatete, Timor Leste labele kontinua hela iha inserteja polítika naruk ne’ebé fó impaktu boot ba situasaun sosiál no ekonomia iha ne’ebé povu mak sai vítima.
“Koligasaun foun ne’ebé lidera husi CNRT ne’e atu haketak no hasees tiha eleisaun antesipada, maibé kuandu laiha tan intendimentu, iha tan impedimentu oioin, sertamente impedimentu sira ne’e mak lori ba eleisaun antesipada, la’ós koligasaun maka provoka eleisaun antesipada,” António subliña ba Jornalista sira antes hamutuk ho partidu lima seluk asina akta koligasaun ba forma governu dasia. (cao)
789 total views, 3 views today
Bele hare Video Seluk :
Subscribe to Timorpost
