DILI (Timor Post.com)— Diretora Fundasaun Caucus Terezinha Maria Noronhã Cardoso hatete partisipasaun feto ba eleisaun suku tenke mentalidade forte hodi kompete.
“Ha’u enkoraja feto maluk sira tenke ba ho mentalidade no konfidensiálidade forte kompete ho mane sira atu hatudu katak feto mós bele lidera”. Diretora Fundasaun Caucus Terezinha Maria Noronhã Cardoso ba Timor Post iha Kaikoli, Kinta-feira (12/10/2023).
Diretora Fundasaun Caucus hatete, prosesu kandidatura ba eleisaun suku, ne’e direitu demokrátiku tantu feto ka mane bele ba partisipa, no sempre ba ho objetivu ida oinsá mak bele manan.
“Ha’u enkoraja ba feto maluk sira ne’ebé atu kandidata-an ba eleisaun suku, labele hanoin atu manan ka lakon, tanba ne’e prosesu ida, maibé tenke hanoin, ita iha mentalidade no konfidensialidade forte bele envolve ona iha elisaun refere.”
Nia dehan, parte sira ne’e hanesan motivu instrumentu ne’ebé atu mentaliza feto sira nia direitu ba oin, no avansa nafatin ba oin, signifika katak hanesan feto mós iha direitu hanesan ho mane, ne’ebé bele partisipa direita iha vida polítika, Kultura, ekonomia no sosiál.
Tanba ne’e husi Caucus nia haree, dezenvolvimentu feto iha Timor Leste, avansadu, liu husi nia mentalidade, kapasidade no konfidensiálidade, nune’e ita garante atu kompete ba eleisaun saída de’it, liuliu eleisaun suku.
“Ha’u agradese tebes bainhira feto maluk sira kompete nafatin iha oportunidade saida de’it mak iha, liuliu partisipa iha eleisaun suku, ne’e prosesu ida ne’ebé hatudu katak feto mós bele lidera, hanesan servi uma laran.” Nia hateten.
Tanba ne’e apresia ba feto maluk sira hotu, atu kapasita nafatin-an ba iha vida polítika saida de’it, no tenke mentaliza-an no konfidensiálidade ba an-rasik, nune’e lori direitu feto sai mós hanesan ho mane, nu’udar direitu igualdade no transparante.
783 total views, 3 views today
Bele hare Video Seluk :
Subscribe to Timorpost
