DILI (timorpost.com) – Portavoz eis profesór kontratadu, Agustinho Pinto, hatete, profesór sira sei lori karta ba Ministériu Publiku (MP), no Provedor Direitu Humanus no Justisa (PDHJ) atu loke investiga kle’an ba autoridade seguransa ne’ebé mak halo kapturasaun no agresaun fíziku hasoru sira profesór sira iha Ministériu Edukasaun.
Nia dehan, autoridade seguransa nia papél mak asegura estabilidade ba povu kbi’it laek sira, la’ós asegura ba elit polítika sira, tanba PNTL nia servisu ba lei no orden, ne’ebé mak tau iha sira nia kabas hodi asegura ema ne’ebé kbiit laek hodi buka lialos no justisa la’ós asegura fali elit polítiku.
“Ami sei kondena no lori karta ba Ministériu Publiku no Provedor Direitu Humanus no Justisa atu investiga ba autoridade seguransa ne’ebé mak halo agresaun fíziku ba ami nia maluk profesór sira ne’ebé mak ezije ami nia direitu,” nia hateten liuhusi konferensia imprensa iha Jardím 5 de Maiu Kolmera-Dili, Segunda (12/02).
Tanba sira ne’ebé hetan agresaun fíziku hosi membru PNTL balu hamonu, hetan tebe, tuku no hakanek profesór kontratadu sira ne’ebé agora balun iha ona Hospital Nasionál Guido Valadares.
“Ho nune’e ami sei entrega karta ba Ministériu Publiku hodi prosesa tuir lei ne’ebé mak iha, tanba PNTL nia papél mak asegura estabilidade ba povu kbi’it laek sira la’ós asegura ba elit polítika sira,” nia hateten.
Tuir nia, atividade ne’ebé mak profesór sira halo ne’e kontinuasaun husi manifestasaun ne’ebé halo iha fulan Jullu 2023, ne’ebé mak hala’o ona nu’udar aktu ne’ebé inklui mós iha Konstituisaun RDTL nian, iha artigu 42, ko’alia kona-ba manifestasaun nian.
“Ami nia atividade ne’ebé mak akontese iha loron 12 Fevereiru 2024, iha Ministériu Edukasaun nia oin ne’e, atividade kontinuasaun husi manifestasaun ne’ebé mak ami hahú tiha ona husi fulan Jullu 2023, no manifestasaun ne’e ami hala’o tiha ona nu’udar aktu ne’ebé mak ami halo inklui mós konstituisaun RDTL,” nia hateten.
Tanba ne’e, nafatin ezije ba Ministériu Edukasaun atu rezolve problema ne’e, no estatutu ba ingressu espesiál hodi dignifika no valoriza profesór kontratadu sira nia sakrifísiu ne’ebé hala’o tiha ona ho volontariu tinan 10 resin.
Nia subliña, asaun ne’ebé mak Ministériu Edukasaun halo ne’e la justu, no halo diskriminasaun ba profesór kontratadu sira, tanba iha profesór balun de’it mak tama ingressu espesiál, maibé sira husik hela profesór rihun ida resin ba ingresu espesiál.
“Ami konsidera asaun Ministériu Edukasaun la justu no halo diskriminasaun ba ami profesór kontratadu sira basa sira halo ingresu espesiál ba ami nia profesór balun de’it, enkuantu sira husik hela ami rihun ida resin ba ingresu espesiál,” nia dehan.
Tuir nia, asaun sira ne’e hotu hahalok diskriminasaun ba profesór kontratadu sira no membru PNTL sira halo agresaun fíziku hasoru profesór sira ne’ebé mak ezije sira nia direitu tuir dalan legál, basa profesór kontratadu la’ós reveldes no la’ós kontra estadu, maibé kontra desizaun nai ulun sira liuliu Ministra Edukasaun ne’ebé mak la obedese ba desizaun nai Primeiru Ministru nian.
Entretantu, membru Polisia Nasionál Timor-Leste (PNTL), ne’ebé mak kaptura eis profesór kontratadu sira ne’e kuaze ema na’in-10 resin.
5,100 total views, 6 views today
Bele hare Video Seluk :
Subscribe to Timorpost
