Aileu(timorpost.com)—Governu liuhosi Ministériu Obras Publika (MOP), halo lansamentu fatuk dahuluk konstrusaun Estrada iha postu administrativu Remexio, munisípiu Aileu ho Kilómetru 5.028 no durasaun konstrusaun loron 731 hahú hosi loron 06 fulan Juñu 2023 to’o loron 06 fulan Juñu 2025.
“Konstrusaun Estrada ho Kilómetru 5.028 ne’e esforsu hosi oitavu governu konstitusionál nian, tanba ne’e ha’u lori oitavu governu nia naran no primeiru ministru nia naran, hakarak hato’o parabéns ba povu Aileu liu-liu ba povu Remexio”, dehan Ministru Obras Publika, Abel Pires da Silva, ba Jornalista sira hafoin serimónia lansamentu konstrusaun estrada iha Postu Administrativu Remexio, munisípiu Aileu, Tersa (06/06).
Nia hatutan, lansamentu estrada ho kilómetru lima resin ne’e hein de’it servisu hosi kompañia lokál sira.
“Hosi estrada ida ne’e ami iha esforsu lubuk ida ba munisípiu Aileu, primeiru ita tenke kompleta dalan hosi postu Remexio ba postu Laklo ida ne’e hanesan fase inisiu, fase avansadu liu mak hanesan estrada munisípiu Aileu ba postu Likidoe no estrada boot hosi munisípiu Ermera Gleno sai mai iha Seloi”, nia tenik.
Iha oportunidade ne’e, Ministru mós husu ba veteranu, autoridade lokál no komunidade sira iha área refere atu kontribui másimu iha prosesu konstrusaun hodi nune’e prosesu konstrusaun bele la’o ho di’ak.
“Hanesan lia tatoli hosi ita-nia na’i Primeiru Ministru katak, favór ida inan-aman sira, liurai sira ajuda atu prosesu sira ne’e bele la’o ho di’ak, prosesu preparasaun sira ne’e liuliu prosesu konstrusaun sira ne’e bele la’o di’ak, ha’u rona parte estrada boot parte Aileu ba Lekidoe ne’e iha problema uitoan iha ne’ebá ha’u husu ba ita-nia na’i veteranu sira iha ne’e, ita-nia na’i ulun sira ajuda ba”, nia subliña.
“Estrada ne’e ba ita hotu, ba povu tomak, ba Timor nia di’ak, importante mak ita asegura ida ne’e hodi depois povu tomak iha kondisaun atu buka moris i implementa duni liafuan ida ita liberta ita-nia povu husi ki’ak no mukit”, Ministru husu.
Ministru agradese ba kompañia kontratór ne’ebé implementa projetu refere ne’ebé la’o daudauk ona, espera katak antes ante natal tinan oin estrada refere bele kaber ona.
“Ohin ita lansa estrada importante ida-ne’e Kilo metru 5,028, tuun mai ne’e servisu la’o daudauk ona, ita seidauk lansa mós kompañia hadi’ak ona ne’ebé ha’u konvida ita hotu basa liman ba reprezentante kompañia iha ne’e”, Ministru agradese ba kompañia.
Projetu refere konstrui husi kompañia Maran-Dai.Lda, Jv ho Adam Motor Unip.Lda, ho montante orsamentu hamutuk millaun 4 resin (4,000,400,31 USD).
Iha fatin hanesan Administradór Munisípiu Aileu, Abel da Conceição, hateten Lansamentu estrada ida ne’e sai hanesan priviléjiu ida ba komunidade, posto adminitrativu Remixio, tanba ofisialmente MOP halo ona lansa ba estrada refere.
Administradór Munisípiu Aileu sente kontente ba lansamentu estrada refere tanba, ho postu neen nulu resin lima ne’ebé iha Timor, oitavu governu hili mós postu administrativu Remixio sai hanesan prioridade.
“Parte seluk ami mós haree katak parte ida ne’e hanesan obrigasaun ida governu nian, tanba fasilidade públiku, sai hanesan responsabilidade ba governu no estadu, ami haree iha oitavu governu hala’o ona sira nia papél ho di’ak ba ami nia estrada”, nia subliña.
Lansamentu projetu ne’e partisipa hosi Administradór rasik ho nia administradór postu administrativu no autoridade lokál sira, Komandu PNTL munisípiu Aileu, Diretór Jerál no Nasionál sira, Amu Pároku iha Remexiu, Kargu Xefia sira hosi instituisaun tutela, tékniku, estudante no komunidade postu administrativu Remexiu nian.
2,355 total views, 3 views today
Bele hare Video Seluk :
Subscribe to Timorpost
