Dili (TimorPost.com)- Autoridade Aduaneiru (AA) husu ba Autoridade Nasionál Kontrolu Tabaku – Timor Leste (ANCT-TL sigla Portugés), atu hatudu evidensia ruma relasiona ho oknum funsionariu alfandega balun iha Fronteira ne’ebé deskonfia fasilita tranzasaun ilegál liuliu tabaku ilísitu, tama iha merkadu Timor-Leste.
Komisáriu Autoridade Aduaneiru, José Fatima Abílio, atividade tranzasaun Ilegál iha postu integradu sira deskonfia funsionáriu Alfándega mak fasilita, klaru ida ne’e bele akontese tanba ema ho ema, no ema nia lalatak mós tenke deskonfia ne’e normal, maibé tenke hatudu evidénsia.
“Ita labele jeneraliza, prontu iha oknum tertentu bele akontese maibé ita presiza evidénsia para bele prevene ema nia direitu asas praduga tak ber sala, ida ne’e tenke respeita,” nia dehan iha Parlamentu Nasionál, Kuarta (15/08).
“Sé deskonfia de’it tantu sosiedade sivíl ka órgaun kompetente sira seluk, kuandu la fó evidénsia ba Alfándega ko’alia de’it entaun labele julga. Ita bele hare hosi dokumentasaun importasaun ne’ebé tama mai ita bele haree hosi X-Ray ne’ebé sira mai scanner, sira nia sasán ita nafatin halo cross-check filafali”, nia hato’o.
Nia hatete, Autoridade Alfandega iha lei atu kondena nia funsionariu ne’ebé hola parte iha partisipasaun ekonomia iha postu integradu sira, maibé tenke iha evidensia atu lori hasoru funsionáriu ne’e.
Tanba ema hirak ne’ebé halo atividade tranzasaun ilegál, sempre iha estratéjia foun atu bele hetan benefísiu ba ninia esforsu ba atividade ilegál ne’e, ema sira ne’e buka modus oi-oin hodi liu, modus hirak ne’e mak hosi instituisaun relevante sira tenke antesipa, oinsá buka kombate.
Durante ne’e tuir nia, sasán ilegál tama mai hosi postu integradu menus, tanba ema uza liu dalan laho nian (jalan tikus), ema hirak ne’e la’ós ultra pasa hosi odamatan fronteira. iha fronteira, iha fasilidade atu lori deteta no kontrolu, tuir prosedimentu internasionál ba kontrolu organizasaun mundiál Alfándega nian.
Haree ba atividade tranzasaun ilegal ne’ebé oras ne’e buras, parte alfandega iha ona planu atu reativa filafali operasaun konjuntu, liu hosi atividade patrulamentu kalan iha fronteira hamutuk Unidade Polisia Fronteira no Unidade Polisia Maritima sira atu bele kombate aktu ida ne’e.
Durante ne’e ekipa operasaun eziste hela maibé tanba iha limitasaun finanseira no fasilidade transporte nune’e ladun la’o ho masimu.
Antes ne’e, Autoridade Nasionál Kontrolu Tabaku- Timor Leste (ANCT-TL sigla Portugés), deskonfia funsionáriu Alfándega balun iha Fronteira fasilita tranzasaun ilegál liuliu tabaku ilísitu, tama iha merkadu Timor-Leste.
“tuir evidénsia balun ne’ebé ami rekolla, deskonfia funsionáriu Alfándega balun ne’ebé iha Fronteira mak fasilita tranzasaun tama iha merkadu TL”, Diretór Ezekutivu ANCT-TL, Sancho Belito Fernandes dehan liuhosi konferénsia ba imprensa iha Sede FONGTIL Kaikoli, Tersa (15/08).
ANCT-TL dúvida tanba durante ne’e hotu esforsu makas ona hodi hapara tranzasaun ilegal tabaku ilisitu, maibé realidade ne’eb’e tabaku ilisitu kontinua buras iha merkadu sira.
ANCT-TL, rekomenda halo investigasaun ba oknum funsionariu autoridade alfándega ne’ebé deskonfia servisu hamutuk ho ema hirak halo tranzasaun ilegál, halo mós investigasaun ba vendedór sira ne’ebé fan tabaku ilísitu, tanba balun la’ós hosi ema hirak hatama ilegál mai maibé sira mós autór, sira rasik mak servisu hamutuk ho Indonézia hodi hatama tabaku ilegál.
Entretantu tuir dadus ANCT-TL, tipu tabaku ilísitu ne’ebé sirkula iha Timor-Leste agora aumenta ona ba 18, kuaze tabaku hirak ne’e Indonézia nian hotu laiha China nian no laiha Japaun nian.
Tabaku ilísitu ho tipu foun ne’ebé sirkula iha TL, barak liu mak iha tipu 3, Surya 12 hosi Indonézia, ho nia nikotina porsentu 60, tabaku ese ho nia savor 4, ho nikotina porsentu 25, arrow black no ida seluk mak bland ho nia tipu savor kuaze 5 to’o 6.
1,719 total views, 3 views today
Bele hare Video Seluk :