Dili(timorpost.com)—Ministériu Edukasaun liuhosi Diretora Jerál Planu Polítika Inkluzaun no Informátika, hakarak investe feto ba area edukasaun, tanba tinan ne’e, tema ba komemorasaun loron Internasionál feto nian maka investe feto atu aselera ba progresu.
Diretora Jerál Plano Polítika Inkluzaun no Informátika Ministeriu Edukasaun, Odelia das Dores Martins, hatete, loron internasionál feto nian tinan ne’e ho nia tema maka “Investe Feto Atu Aselera Progresu”, tanba ne’e Ministériu Edukasaun sei selebra loron feto nian hamutuk ho autoridade no komunidade sira iha Munisípiu Ainaru, atu fó motivasaun ba feto sira hodi brani foti desizaun iha munisípiu nia laran.
“Selebrasaun loron internasionál feto nian tinan ne’e ho nia tema “Investe Feto Atu Aselera Progresu”, tanba ne’e Ministériu Edukasaun hakarak selebra iha Munisípiu Ainaru hamutuk ho Prezidente Autoridade no komunidade sira ne’ebé maka ami identifika katak hamutuk organiza feto potensiál iha munisípiu ne’ebá”, , Odelia das Dores Martins, informa ba Timor Post iha nia servisu fatin Vila-Verde Dili, Kinta (07/03).
Nia hatete, iha selebrasaun refere atu enkoraja feto sira liuliu iha munisípiu no prepara atu investe iha area edukasaun.
“Ha’u nia parabéns ba feto maluk sira iha Timor-Leste hosi nivel nasionál to’o iha nivel munisipál liuliu iha area remotas, ita hamutuk lolo liman ba malu no fó reforsa malu atu investe ita nia oan sira nia futuru hodi bele hetan progresu di’ak atu bele hetan rezultadu ne’ebé maka di’ak, tanba mehi ne’ebé ita hatuur ona iha planu 2011-2030 nian ho ida ne’e maka ita presiza investe feto sira iha edukasaun”, nia hato’o.
Alende ne’e sei fahe informasaun ba estudante feto sira ,tanba iha nivel eskola iha violénsia ne’ebé aas entre feto no feto, tanba ne’e maka liuhosi informasaun sira ne’e maka bele muda sira nia hanoin no mentalidade karakterístiku umanu nian.
“Ita tenke sosializa beibeik ba ita nia feto maluk sira, tanba ita haree katak iha nivel eskola mós nivel violénsia ne’e aas entre feto ho feto, tanba mentalidade ka maneira ransu entaun buat sira ne’e hotu muda ema nia ema nia hanoin ho nune’e maka ita tenke promove unidade iha eskola”, nia hatutan.
4,428 total views, 6 views today
Bele hare Video Seluk :