Dili(timorpost.com)—Ofisial Formadór Forum Komunikasaun Feto Timor-Leste (FOKUPERS), Maria Abrantes, dehan envolvimentu feto iha vida polítika daudaun ne’e hanesan prenxe de’it rekizitu, maibé la’ós tanba merese.
“Kona-ba kestaun envolvimentu feto iha polítika, ita kaer hela kritériu hosi partidu polítiku sira obriga atu kargu sira ne’e primeiru mane, segundu mós mane no terseiru mak feto, ne’e realidade iha ita nia rai, ita labele nega”, dehan formadór FOKUPERS, Maria Abrantes, ba Timor-Post iha nia servisu fatin, Segunda (07/03).
“Polítika ida ne’e di’ak, tanba oinsá atu hasa’e partisipasaun feto iha vida polítika, maibé iha parte seluk mós ha’u hanoin polítika ida ne’e sai fali hanesan fó espasu ba feto, tanba hanoin ida hanesan kasian de’it ka prenxe kritériu de’it, maibé la’ós tanba feto ne’e merese duni atu hetan pozisaun sira hanesan ne’e”, nia deklara.
Nia subliña, maibé iha progresu ida mak komesa feto iha lideransa barak, hanesan iha membru governu no iha Parlamentu Nasionál no instituisaun sira seluk tan, inklui iha xefe suku na’in-neen ka na’in-hitu ona, maski ne’e númeru ki’ik, maibé hahú ona feto empodera-an iha vida polítika no lideransa ninian.
Maibé iha parte seluk númeru sira ne’e la natoon presiza ba oin ne’e aumenta tan no sei la liuhosi polítika ida hanesan feto prenxe kritériu de’it ne’e, maibé hakarak hola parte iha kestaun polítika sira merese duni atu hetan pozisaun sira ne’e.
“Feto Timor-Leste ha’u hanoin ita bele empodera-an di’ak liután no utiliza mane sira ne’ebé hale’u ita, sai hanesan ita nia parseiru hodi apoiu ita, maibé la’ós sai hanesan kompetitór ka sai ita nia rival”, nia hateten.
Nune’e mós feto para ona hodi tau nia-an hanesan ema vulneravel ka terus nain loos iha situasaun hotu, maibé feto mós iha ona espasu no oportunidade barak, entaun fila fali ba konxiénsia feto ida-idak ninia atu utiliza espasu sira ne’e.
Tanba oportunidade sira sei la ba buka iha fatin, maibé tenke hasai konxiénsia hodi buka rasik espasu empodera-an iha fatin hotu-hotu nune’e ema rekoñese kapasidade hodi bele ema fó konfiansa ba pozisaun importante sira iha prosesu dezenvolvimentu Timor-Leste ninian.
Nia dehan, ba komemorasaun loron internasionál feto tinan 2023 ida ne’e, hakarak fó parabéns ba feto hotu-hotu iha rai laran tantu iha munisípiu no area rural sira hotu.
“Selebrasaun tinan ida ne’e nia temátiku liga liu ba iha teknolojia entaun ha’u hanoin ida ne’e bele sai hanesan hanoin ida bele fó mai ita hotu espesiál ba Timor-Leste hanesan nasaun foun ida tenke uza oportunidade ka uza espasu sira ne’ebé mak ita iha, labele tau-an liu hanesan ema ne’ebé mak vulneravel, nune’e bele empodera-an partisipa prosesu sira iha ita nia rai”, nia hakotu.
1,533 total views, 3 views today
Bele hare Video Seluk :
Subscribe to Timorpost
