Baukau (timorpost)—Prezidente Autoridade Munisípiu (PAM) Baukau foin simu tomada pose iha loron 18 fulan Janeiru 2024, foin semana rua, seidauk halo rekrutamentu ba funsionáriu no seidauk hapara funsionáriu ruma.
“Ha’u mai reprezenta Governu sentrál, simu tomada pose iha loron 18 fulan Janeiru 2024, ne’ebé ha’u foin servisu semana rua, ha’u seidauk halo kontratu ho ema ida, seidauk hapara ema, kontratu ha’u la asina oinsá mak ha’u hapara funsionáriu, iha kontratu nia laran hatete saida mós ha’u la hatene”, Prezidente Autoridade Munisípiu (PAM) Baukau, Veneranda Lemos, informa ba Timor Post, hatán ba PAM sesante nia preokupasaun iha ninia servisu fatin Baukau, Segunda (05/02).
Ne’ebé PAM Baukau, laiha responsabilidade ba ida ne’e, tanba nia la halo kontratu no la hapara funsionáriu sira, tanba nia foun.
“Iha joven balun mai hasoru ha’u dehan sira hetan kontratu, maibé kontratu remata ona, ne’ebé ha’u enkontru ho sira, maibé sira grava ha’u nia lian hodi tau iha média sosiál hodi trata ha’u ne’e laiha problema, bele halo de’it ba, maibé ha’u hakarak hatete, ha’u selebra kontratu ho ema ne’ebé iha étika, ho ema ne’ebé laiha étika ha’u la simu”, nia subliña.
Nia mós rekoñese, foin daudauk nia halo ona kontratu ho funsionáriu kontratadu na’in neen, bazeia ba proposta hosi administradór postu sira husu funsionáriu balu ba apoiu administrasaun iha postu administrative neen iha munisípiu Baukau ho durasaun tempu fulan tolu to’o fulan neen.
“Liafuan ne’e la’ós ona segredu, ha’u sama atensaun ba funsionáriu hotu-hotu katak, sira servisu iha funsaun publika, administrasaun publika ne’e sira iha ierarkia, iha Diretores, iha Xefe Departamentu, ne’e duni bainhira sira sente buat ruma la dun di’ak ka iha problema ruma hasoru sira nia ierarkia atu tuur hamutuk hodi buka solusaun, la lika buka medsos, por ke media la rezolve problema, ne’ebé ha’u ko’alia ba funsionáriu sira labele gosta status iha medsos hanesan saida mak akontese iha nasaun Españól ne’ebá”, nia hakotu.
3,160 total views, 6 views today
Bele hare Video Seluk :
Subscribe to Timorpost
