Dili (timorpost.com)—Klube reprezentante munisípiu Baukau, Zebra Fc, susesu empate ho nia adversáriu Lika-Lika Lemorai Fc, hodi lori nia ekipa ba okupa provizóriu Tabela Klasifikasaun Dahaat, Liga Timorense segundu divizaun.
Jogu kontinuasaun liga Timorense segundu divizaun jornada datoluk ne’ebé mak realiza iha estádiu munisipál Dili, Domingu (19/03) loraik entre ekipa Zebra Fc kontra Lika-Lika Lemorai Fc ne’e rezultadu ikus empate de’it ho score 0-0.
Rezultadu jogu empate ho score 0-0 ne’e hatudu ba adeptu sira hotu iha estádiu Munisipál Dili loraik ne’e espesiál ba sira ida-idak ninia adeptu katak, sira nia forsa hanesan no sorte mak hanesan hodi labele manan malu ka hatama golu ba malu.
Nune’e iha jogu parte dahuluk bainhira kick off jogadór hosi ekipa rua muda bola ain ba ain hodi halo presaun no atake ba malu ne’ebé jogadór sira hosi Lika-Lika Lemorai halo presaun makaas ba ekipa adversáriu Zebra Fc ninian.
Iha ne’ebé presaun ne’e ekipa Lika-Lika Lemorai Fc, halo hodi aproveita ba iha parte Zebra nia ekipa liña klaran monu, nune’e sira aproveita hodi halo kedas presaun ne’ebé mak makaas hodi hatama golu, maibé la hetan oportunidade atu hatama golu.
Ho presaun ne’e ekipa Lika-Lika Lemorai nia avansadu sira hetan oportunidade barak ameasa baliza adversáriu, maibé la konsege marka golu no Zebra Fc mós halo kontra atake hodi hetan oportunidade balun atu ameasa baliza Lika-Lika Lemorai, maibé la konsege marka golu to’o jogu parte dahuluk minutu remata ho score 0-0.
Hakat fali ba iha jogu segundu parte ninian, ekipa rua muda sira nia tátiku, estratéjia no formatu sira hotu, espesiál ba ekipa Zebra Fc muda kedas sira nia liña klaran nune’e sira bele hetan bola ka domina bola hodi buka oportunidade hatama golu.
Iha ne’ebé ekipa Zebra Fc halo substituisaun ba jogadór na’in-lima iha liña defeza, klaran ho avansadu, enkuantu Lika-Lika Lemorai troka jogadór na’in-haat nune’e mós iha parte defeza, liña klaran no avansadu ninia, hodi halo nafatin presaun ba malu, maibé konsege marka golu.
Hela de’it minutu ida jogu atu termina ona, maibé ekipa Lika-Lika Lemorai Fc, hetan oportunidade osan mean hafoin arbitrajen deside fó penalidade ba sira, iha ne’ebé jogadór Zebra Fc halo erru iha grander laran.
Maibé oportunidade osan mean ne’e nabeen de’it hafoin jogadór Liborio Jerónimo sai nu’udar ezekutór ba suta penalidade, la halo nia funsaun ho di’ak hodi hatama golu, to’o jogu termina ekipa rua fahe Pontus ba malu ho score 0-0.
Ho rezultadu rezulta empate ne’e lori ekipa Zebra ba okupa provizóriu iha tabela klasifikasaun dahaat, enkuantu ekipa Lika-Lika Lemorai tuur de’it iha tabela klasifikasaun daneen divizaun daruak Liga Timorense époka 2023.
1,737 total views, 3 views today
Bele hare Video Seluk :
Subscribe to Timorpost
