Ermera(timorpost.com)— Fundus Nasoins Unidas Populasaun (UNFPA) iha Timor-Leste hamutuk ho Ministériu Saúde (MS) halo lansamentu ba Fatin Seguru iha Sentru Saúde Integradu (SSI) Gleno munisípiu Ermera.
Diretór Rejionál Fundus Nasoins Unidas ba Populasaun (UNFPA) ba Ázia no Pasífiku, Bjorn Anderson, dehan hanesan onra boot hodi UNFPA nia naran atu sai sasin ba lansamentu Fatin Seguru ba sobrevivente hosi Violénsia Bazeia ba Jéneru iha Sentru Saúde Integradu Gleno.
“Ha’u kontente tebes hodi hola parte iha lansamentu Fatin Seguru ne’ebé sei apoiu setór saúde, abilidade atu prevene no responde ba Violénsia Bazeia ba Jéneru, ha’u hanoin ida ne’e importante tebes, depois estabelese fatin seguru ne’e hanesan espasu ida ne’ebé mak bele fornese servisu ne’ebé mak esensiál”, Bjorn Anderson, nia diskursu ba Lansamentu Fatin Seguru, Sentru Saúde Internamentu Gleno, Ermera, Tersa(07/03).
Nia hatete, fatin seguru hanesan espasu ida ne’ebé harii besik iha fasilidade saúde kompleta ho ekipamentu no rekursu umanu (Pesoál saúde formadu), pesoál saúde sira sei uza hodi halo atendimentu ba kazu sira ho karakter Violénsia Bazeia ba Jéneru ka Violénsia Doméstika, abuzu seksuál ka asaltu seksuál.
“Tanba kazu sira ne’e kuandu mosu no sobrevivente atu mai buka tulun iha fasilidade saúde tenke iha fatin ida hakmatek no seguru atu nune’e ita nia maluk sobrevivente bele sente seguru”, nia tenik.
Nia hatutan, hanesan ajenda UNFPA apoiu nafatin governu ba servisu tékniku nian, ida ne’e hanesan servisu integradu ida, no mós sira aprende, katak fó servisu ne’ebé mak integradu no presiza koordenasaun servisu hamutuk ho Setór hot-hotu.
Fatin Seguru iha Sentru Saúde Internamentu Gleno ne’e hetan apoiu fundus hosi Embaixada Uniaun Europeia iha Timor-Leste ho montante 31,107. 58 USD .
Iha fatin hanesan, Ministra Saúde, Odete Maria Freitas Belo, hatete nia marka prezensa iha Gleno hodi halo programa lansamentu ba Fatin Seguru ka Uma Mahon iha Sentru Saúde Internamentu Gleno.
“Ida ne’e servisu ida ne’ebé mak Servisu Saúde Munisípiu Ermera nian servisu hamutuk ho UNFPA, katak ida ne’e liu Ministériu Saúde, maibé sira besik liu ho Organizasaun ne’e hodi harii fatin hakmatek ida ne’e ba ita nia feto maluk sira, la’ós ba feto, maibé mós ba se-se de’it”, nia informa.
Nia hatete, fatin seguru ne’e fó prioridade liu ba feto ho labarik sira ne’ebé mak hasoru problema Bazeia ba Jéneru no violénsia doméstika.
Alende ne’e Diretór Servisu Saúde Munisípiu Ermera, Joni Alves dos Santos, hatete lansamentu ba fatin seguru iha sentru saúde integradu Gleno ne’e nakloke ba iha komunidade sira ne’ebé mak presiza duni asisténsia saúde ne’ebé hakmatek.
Aumezmu tempu bele fó terapia katak kura ba moras atu ema bele re-koopera fila fali.
“Tanba ne’e ha’u lori munisípiu nia naran fó agradese ba entidade hot-hotu liu-liu ba UNFPA ho inisiativa di’ak hodi fasilita Sentru Saúde Internamentu no konstroi Fatin Seguru ida ne’e no Agradese mós ba Ministra Saúde, Odete Maria Freitas Belo ne’ebé maka mai hamutuk ho ami iha momentu ida ne’e”, nia agradese.
Partisipa iha lansamentu ne’e mak hanesan Ministra Saúde, Odete Maria Freitas Belo, Reprezentante hosi Sekretáriu Estadu Igualdade no Inkluzaun, Diretór Rejionál UNFPA, Bjorn Anderson, Reprezentante UNFPA iha Timor-Leste, Pressia Arifin-Cabo, Embaixadór Uniaun Europeia, Marc Fiendrich, Reprezentante Prezidente Autoridade Munisípiu Ermera, Pesoál Servisu Saúde Munisípiu Ermera no Komunidade sira.
1,145 total views, 3 views today
Bele hare Video Seluk :
Subscribe to Timorpost
