DILI, (timorpost.com)— Komandante Jerál PNTL, Komisáriu Polísia, Henrique da Costa, hatete relasiona ho kazu Likintai tribunál fó ona desizaun aprezentasaun periódika ba arguidu LS no Komandu PNTL mós aplika medida suspensaun preventiva ba arguidu nu’udar membru PNTL.
“Parte disiplinár ita sei foti medida internál ita-nian, para atu nune’e hodi kontinua prosesu internál ita-nian kona-ba disiplinár ne’e, ita sei foti medida suspensaun preventiva ne’e, aplika medida ida ne’e para atu nune’e ita hodi hala’o prosesu ida-ne’e”, Komandante Jerál PNTL, Komisáriu Polísia, Henrique da Costa, informa ba jornalista sira iha komandu PNTL munisípiu Dili, Kinta, (22/02) hafoin hala’o vizita dahuluk ba Komandu PNTL Dili.
Komandante Jerál ne’e hatutan “Suspensaun preventiva ne’e signifika katak nia labele hala’o servisu, mais agora daudaun ne’e tanba seidauk hasai despaxu, horsehik mak ita foin hetan desizaun ida-ne’e, ho ida-ne’e komandu PNTL prepara hela”.
Entretantu liga ba kazu ne’e, Tribunál Judisiál Primeira Instánsia Díli (TJPID), Kuarta-feira (21/02) ne’e deside aplika medida koasaun aprezentasaun periódika ba arguidu ho insial LS ne’ebé envolve iha insidente ne’ebé akontese iha loron-Domingu, (18/02), tuku 03:00 madrugada iha área Likintae, suku Lahene Orientál, postu administrativu Na’in Feto, munisípiu Dili, iha ne’ebé membru PNTL tiru membru Falintil Forsa Defeza Timor-Leste (F-FDTL) husi Komponente Navál.(*)
2,721 total views, 3 views today
Bele hare Video Seluk :