DILI, (timorpost.com)— Providoria ba Direitu Humanus no Justisa (PDHJ) konklui ona relatóriu investigasaun hamutuk 79 kona-ba violasaun direitu humanus no atendimentu públiku ka boa governasaun hasoru sidadaun sira ne’ebé akontese iha Timor-Leste.
“Iha trimestrál III, IV 2023, PDHJ halo investigasaun no prodús relatóriu investigasaun hamutuk 79, kompostu husi relatóriu investigasaun finál ho rekomendasaun 10 ba violasaun direitu umaus no governasaun di’ak, relatóriu investigasaun ho sujestaun 15 no relatóriu badak arkivu 54”, Provedór PDHJ, Virgilio da Silva Guterres ‘Lamukan’, iha nia diskursu iha serimónia publikasaun no entrega Relatóriu Investigasaun Finál (RIF) ba entidade relevante sira, iha sala biblioteka PDHJ, Tersa, (06/02).
Nia hatutan, RIF ho rekomendasaun hirak ne’e ralasiona ho violasaun direitus umanus liga ba asaun husi membru Polísia Nasionál Timor-Leste (PNTL) ne’ebé viola sidadaun nia direitu ba liberdade, integridade no seguransa espesifikamente tratamentu aat, kruél no la umanu, no direitu ba moris, iha mós asaun husi funsionáriu balun ne’ebé prátika asaun administrasaun ladi’ak, no sees husi PNTL nia poder.
“Iha relatóriu investigasaun finál ho rekomendasaun 6 ami sei entrega ba Komandu Jerál PNTL, rekomendasaun 1 sei entrega ba eselénsia Ministru Estatál, rekomendasaun 1 sei intrega ba eselénsia Minista Solidariedade Sosiál, rekomendasaun 1 sei entrega ba eselénsia Ministra Edukasaun, no rekomendasaun 1 sei entrega eselénsia Ministra Finansas. Ita-boot sira bele haree rekomendasaun no sujestaun hirak ne’e iha relatóriu ne’ebé sei entrega”, nia rekomenda.
Iha mós RIF ho sujestaun ne’ebé PDHJ konklui katak la akontese violasaun direitu umanu no governasaun di’ak tanba respondente sira hala’o sira-nia kna’ar tuir lei no prosedimentu legál ne’ebé iha. Mezmu la akontese violasaun direitu umanu no governasaun di’ak, Provedór hanoin katak bele hato’o relatóriu ne’e nu’udar oportunidade importante ba instituisaun respondente atu halo diálogu ho entidade relevante sira.
“Ha’u hanesan Provedór bele hetan informasaun kle’an kona-ba prosedimentu, sistema internál ka prátika husi instituisaun públiku, no hakarak fahe mós PDHJ ninia opiniaun kona-ba mekanizmu atu hametin liután direitu umanu no govenasaun di’ak iha Timor-Leste, relatóriu sujestaun hirak ne’e sei entrega ba eselénsia Ministru Administrasaun Estatál, Ministra Edukasaun, Ministra Solidariedade Sosiál, Ministru Agrikultura, Universidade Nasionál Timor Lorosa’e, Presidente Autoridade Protesaun Sivíl, no Komando Jerál PNTL,” nia akresenta.
Enkuatu, iha trimestrál III no IV tinan 2023, PDHJ mós konklui relatóriu badak arkivu 54 kompostu husi relatóriu arkivu relasiona ho kazu rezolve ona iha tribunál, PNTL no entidade relevante sira. Kazu hirak ne’e relasiona ho violasaun direitu ba liberdade, integridade no seguransa espesifikamente tratamentu aat, kruel, la umanu, violasaun ba direitu ba privasidade, direitu ba família, no mós aktu prátika ilegalidade, administrasaun la di’ak no sees husi poder.
Bainhira instituisaun relevante simu ona relatóriu investigasaun finál ho rekomendasaun, tenke hato’o informasaun ba PDHJ kona-ba sasukat sira ne’ebé foti atu kumpri ka hala’o rekomendasaun sira ne’ebé hatada ona ne’e iha loron 60 (neen nulu) nia-laran, tuir artigu 47. 3, husi estatutu PDHJ, konta husi data simu relatóriu ne’e. See instituisaun relevante la kumpri ka la hala’o lia-menon hirak ne’e, PDHJ bele komunika akontesimentu ida-ne’e ba Parlamentu Nasionál, tuir artigu 34 no 46 husi estatutu PDHJ nian.
Iha fatin hanesan, representante Komandu Jerál PNTL, José Soares, agradese, tanba provedór hanesan instituisaun ne’ebé independente Estadu demokrátiku deréitu ida-ne’e bele halo supervizaun no monitorizasaun, inklui fiskaliza ajente Estadu ne’ebé hetan fundu husi Estadu ida-ne’e inklui autoridade seguransa PNTL.
“Ajente Estadu hotu, liuliu Polísia Nasionál Timor Leste atu ezerse nia funsaun tenke tuir lei inan no lei oan sira, inklui norma sira hotu, hodi nune’e labele sees husi kompeténsia prinsiál sira ne’e, nune’e labele konflitu ho direitu humanu, ha’u garante katak, karik ha’u-nia membru sira hotu, ita-nia polísia kuandu nia hatene hotu kompeténsia ne’ebé lei fó, sei la konflitu sidadaun ida nia direitu, Hanesan timoroan, atu tau iha ita-nia hanoin tomak”, nia hatete.
Nia hatutan, “Hakarak ka lakohi, interese Estadu no interese koletiva ema barak nian, ita tenke asegura, mais la signifika katak ita tenke uza ita-nia poder hodi kontra ita-nia lei sira ne’ebé iha”.
Nia mós hatete katak, ba sidadaun sira labele hatete de’it dieitu umanu maibé haluha devér sira seluk.
Marka prezensa iha entrega RIF ne’e, Vise-Ministra Finansas, Felícia Claudinanda Cruz Carvalho, Komandante Operasaun Nasionál PNTL, Superentintidente Xefe, José Soares, reprezentante Ministériu Administrasaun Estatál (MAE), reprezentante Universidade Nasionál Timor Lorosa’e (UNTL), reprezentante Ministériu Agrikultura Pekuária, Peskas no Floreta (MAPPF), reprezentante Ministériu Edukasaun (ME), no reprezentante husi Protesaun Sivíl.(*)
2,913 total views, 3 views today
Bele hare Video Seluk :
Subscribe to Timorpost
