DILI (timorpost.com) – Ministru Defesa ho Komandu FALINTIL-Forsa Defeza Timor-Leste (F-FDTL), planu halo rekrutamentu foun ba Ofisiais F-FDTL Na’in-80 iha tinan 2023.
Ministru Defeza (MD), Filomino da Paixão de Jesus, hatete rekrutamentu kadetes F-FDTL foun nain-80 ne’e ba de’it Ofisiais sira iha area sira hanesan, Saúde, Enjenaria no Direitu, hodi apoiu institusaun F-FDTL iha tinan oin.
“Ita iha tinan 2023, planu atu halo tan rekrumentu F-FDTL hamutuk nain-80, maibé espesialista hodi kompleta institusaun F-FDTL nian servisu, maibé ba de’it iha area saúde, enjenaria no direitu, hodi apoiu instituisaun F-FDTL iha tinan oin,” nia hateten hafoin partisipa aprezentasaun relatóriu atividade Defeza no F-FDTL iha auditoria F-FDTL Fatuhada, Kinta (22/12).
Nia hatete, rekrutamentu F-FDTL foun nain-80 ne’e, ba nivel sira hanesan, lisensiatura S1 ho S2 de’it, hodi bele apoiu iha instituisaun F-FDTL.
Iha fatin hanesan, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jeneral, Domingos Raul Falur Rate Laek, hatete komandu F-FDTL, iha tinan oin, sei halo tan rekrutamentu ba FFDTL foun, maibé ho rejime espesiál doutoramentu iha area saúde, enjenaria no direitu.
“Tinan oin, atividade ne’e fatin halo iha instituisaun F-FDTL ne’e nafatin, Maibé ha’u anúnsiu ona ha’u-nia intensaun para intermu de rekursu pesoál nian ha’u sei rekruta espesiál ida ba tékniku espesialista sira, para mai sai hanesan motor ida aranka prosesu de administrasaun ho jestaun institusionál,” nia hakotu.
1,783 total views, 3 views today
